Lönduðu 223 milljóna afla

Frystitogarinn Blængur landaði 516 tonnum af blönduðum afla í Neskaupstað í gær. Mest var af grálúðu og var verðmæti aflans 223 milljónir króna, að því er fram kemur í færslu á vef Síldarvinnslunnar sem gerir Blæng út.

„Hér um borð eru allir sprækir og hressir. Veiðin gekk þokkalega og við fórum hringinn í þessum túr. Við byrjuðum fyrir austan, fórum suður fyrir land og enduðum fyrir austan. Veður var ágætt að mestu, en við flúðum að vísu af Vestfjarðamiðum vegna veðurs,“ er haft eftir Bjarna Ólafi Hjálmarssyni, skipstjóra á Blængi, í færslunni.

„Umtalsverð lækkun hefur orðið á fiskverði síðustu mánuði og eru slíkar verðsveiflur afar hvimleiðar. Ef til vill var verðið orðið óeðlilega hátt þegar það var hvað hæst. En verðsveiflur eins og þessar eru ekki nýjar af nálinni og getur ýmislegt valdið þeim. Nú bíðum við bara eftir að verðin hækki á ný,“ segir Bjarni Ólafur.

Áhöfnin á Blængi NK með gott hol. Ljósmynd/Síldarvinnslan/Hreinn Sigurðsson

• Blogga um frétt