Tryggja landeldisstöð Thors raforku

Thor landeldi (áður Landeldi) hefur tryggt sér raforku fyrir laxeldi sem er í undirbúningi í grennd við Þorlákshöfn. Orka náttúrunnar (ON) og Thor landeldi ehf. undirrituðu samning þess efnis á föstudag, sem tryggir Thor landeldi ehf. 5 MW af raforku.

Thor landeldi ehf. áformar uppbyggingu á 20.000 tonna laxeldi í Þorlákshöfn og hefur tryggt sér rúmlega 20 hektara lóð við Laxabraut vestan við Þorlákshöfn. Áætluð heildarframleiðsla í þessum áfanga verkefnisins er sögð 5.000 tonn, en fyrsti áfangi verkefnisins er bygging seiðaeldisstöðvar. Jafnframt var undirrituð viljayfirlýsing um aukningu upp að 10 MW sem styður við frekari uppbyggingaráform Thor landeldis.

Verkefnið er í umhverfismatsferli en gert er ráð fyrir að tekið verði á móti fyrstu hrognunum í seiðaeldisstöðinni haustið 2024.