„Andstaða þeirra aldrei verið studd með gögnum“

„Það er svo sem ekki nýtt að LS beiti sér gegn dragnótaveiðum. Smábátasjómenn hafa gert það í yfir hundrað ár og á þeim hundrað árum hefur andstaða þeirra aldrei verið studd með neinum gögnum,“ segir Friðrik G. Halldórsson, formaður Samtaka dragnótamanna, um að Landssamband smábátaeigenda (LS) hafa lýst andstöðu við stækkun svæðis sem dragnótaveiðar eru heimilar út af Suðurlandi.

Stjórnvöld hafa lagt til að breyta gildandi regluverki þannig að veiðar með dragnót verði heimilar á tveimur svæðum í stað sjö svæða áður, en þrátt fyrir að svæðum þar sem heimilt er að veiða með dragnót fækki mun þekja svæðanna tveggja vera meiri en þessara sjö sem skipt er út.

Frétt af mbl.is

Vilja stækka dragnótasvæði

„Þessi einföldun er alveg í samræmi við niðurstöður starfshóps um faglega heildarendurskoðun á regluverki varðandi notkun veiðarfæra, veiðisvæði og verndunarsvæði á Íslandsmiðum,“ segir Friðrik.

Í umsögn sinni vegna áformanna sagði LS meðal annars: „Skoða þarf sérstaklega hvort áhrif af fyrirhugaðri breytingu á reglugerð hafi áhrif á hrygningu nytjastofna, verndun ungviðis eða búsvæði sem skoða þarf sérstaklega. Jafnframt telur Hafrannsóknastofnun sig ófæra um að taka faglega afstöðu þeirra breytinga á reglugerð sem um ræðir.“

Ítarlega rannsakað

Friðrik bendir á að í skýrslu fyrrnefnds starfshóps sem birt var í september 2018 segir er sérstaklega farið yfir rannsóknir á áhrifum dragnótar. Í skýrslunni segir að Hafrannsóknastofnun hafi ítrekað í áraraðir bent á að „fyrirliggjandi athuganir og rannsóknir sýni að áhrif dragnótaveiða á botn og lífríki séu tiltölulega lítil og því engar verndunar- eða fiskifræðilegar forsendur fyrir banni við notkun dragnótar á mörgum þeim svæðum sem nú eru lokuð.“

„Í starfshópnum voru meðal annarra sérfræðingur frá fiskistofu og fræðingar frá Hafrannsóknastofnun þar á meðal núverandi forstjóri Hafró,“ segir Friðrik og bætir því við að alþjóðahafrannsóknaráðið (ICES) hafi í greiningum sínum á umhverfisáhrifum veiðarfæra lagt dragnót og handfæri að jöfnu.

„Kjörhæfni dragnótarinnar gagnvart ungviði er mun betri en þau veiðarfæri sem smábátasjómenn nota. Það er nóg til af rannsóknum og skýrslum um áhrif dragnótaveiða á lífríkið, öfugt við að sem LS heldur fram að það þurfi frekari rannsóknir,“ segir hann.

• Blogga um frétt