Laxey opnar seiðaeldisstöð

Í september lauk Laxey (áður Icelandic Farmed Salmon ehf.) við sex milljarða króna hlutafjáraukningu en félagið stendur einnig fyrir uppbyggingu áframeldisstöðvar í Viðlagafjöru. Áframeldisstöðin verður byggð í sex jafnstórum áföngum, en stefnt er að því að fyrsti áfangi verði tilbúinn um mitt ár 2024 og fyrsta slátrun fari fram síðla árs 2025.

Áætlaður kostnaður við þennan áfanga er 25 milljarðar og þrír milljarðar að auki við seiðastöð. Skilyrði til laxeldis á landi í Vestmannaeyjum eru afar góð og aðstæður hagstæðar.

Notast er við endurnýtingarkerfi á vatni í áframeldi, þar sem um 65% af sjónum eru endurnýtt en 35% eru ferskur jarðsjór sem dælt er upp úr borholum á svæðinu. Fiskifréttir Viðskiptablaðsins greindu frá því fyrr í vikunni að fyrstu hrognin hefðu verið tekin inn í seiðaeldisstöðina.

Gert er ráð fyrir að yfir 50 manns muni starfa hjá fyrirtækinu þegar það hefur náð fullri framleiðslugetu. Fyrri eigendur fyrirtækjanna ÓS ehf. og LEO Seafood ehf. hafa tekið þátt í verkefninu frá upphafi og verða kjölfestufjárfestar í Laxey. Fjölskyldan hefur stundað sjávarútveg í Vestmannaeyjum í 75 ár.