Vigri úr slipp eftir bilun í stýrisbúnaði

„Við erum að taka skipið úr kvínni og færum okkur að næstu bryggju til að taka hlera um borð, förum síðan beint á veiðar aftur,“ sagði Arnar Ævarsson, skipstjóri á Vigra RE 71, við Morgunblaðið síðdegis í gær en Vigri þurfti að fara til viðgerða í slippnum á Akureyri eftir að bilun kom upp í stýrisbúnaði skipsins.

Vigri hafði verið í rúma viku á veiðum í Reykjafjarðarálnum þegar bilunin kom upp. Skipinu var siglt til Akureyrar og þar var 3.500 kössum af fiski landað. Leggja átti aftur af stað í gærkvöldi til veiða í Reykjafjarðarálnum.