Ástand vinnsluhúss Stakkavíkur eftir jarðhræringarnar sem herjað hafa á Grindavík er ekki gott að sögn Hermanns Ólafssonar framkvæmdastjóra útgerðarinnar. Nýlega hafi verið fjárfest fyrir um 100 milljónir til að gera upp aðstöðu til að sýna ferðamönnum íslenskar línuveiðar og vinnslu, en nú bíða um hundrað starfsmenn Stakkavíkur eftir því að vita hvort húsið verði dæmt ónýtt.

„Staðan á húsnæðinu er ekki góð. Þetta lítur ekki vel út. Ég bíð bara eftir svari frá Náttúruhamfaratryggingu Íslands. Þeir komu og tóku þetta út og nú er bara spurning hvað þeir vilja gera – hvort þeir dæmi húsið ónýtt,“ segir Hermann í viðtali í blaði 200 mílna sem fylgdi Morgunblaðinu á Laugardag.

„Húsið er á sprungu og ég veit ekkert hvernig þeir meta það. Þetta lítur mjög illa út en þetta er fljótt að taka á sig aðra mynd ef byrjað er að laga. Þetta eru aðallega gólf og veggir sem hafa orðið fyrir skemmdum. Það er örugglega hægt að laga þetta en maður bíður bara eftir niðurstöðunni svo maður geti byrjað. Það er það sem er verst, að bíða.“