Aflaverðmætið 154 milljarðar á fyrstu 9 mánuðum

Verðmæti afla við fyrstu sölu var 154,5 milljarðar króna á fyrstu þremur fjórðungum ársins 2023 samkvæmt bráðabirgðatölum Hagstofu Íslands. Um er að ræða 3% aukningu frá sama tímabili 2022 en þá var aflaverðmæti tæplega 150 milljarðar króna. Mesta aukning aflaverðmæta er í síld og nemur hækkunin tæplega fjórum milljörðum króna.

Aukning aflaverðmætis kemur þrátt fyrir 4% samdrátt í magni. Heildarafli nam 1.116 þúsund tonn á fyrstu þremur ársfjórðungum en var 1.168 þúsund tonn á sama tímabili á síðasta ári.

Botnfiskaflinn á fyrstu þremur ársfjórðungum var 298.357 tonn sem 10% minna en á sama tíma í fyrra og var verðmæti aflans við fyrstu sölu 94,6 milljarðar króna sem er 7% lækkun frá sama tímabili 2022.

Mesti samdrátturinn í afla var í ufsa, en 37% minna var landað af tegundinni á fyrstu níu mánuðum þessa árs borið saman við síðasta ár. Þá varð næstmesti samdrátturinn í þorski og var 13% minna landað af tegundinni, en verðmæti aflans minnkaði aðeins um 6%.

Síldin mun verðmætari

Á fyrstu níu mánuðum ársins var landað 795,8 þúsund tonnum af uppsjávarfiski sem er 3% minna en á sama tíma í fyrra. Athygli vekur að þrátt fyrir samdráttinn varð 23% aukning í verðmæti aflans og var aflaverðmætið við fyrstu sölu 48,6 milljarðar króna.

Íslenski uppsjávarflotinn landaði 22% meira af síld á tímabilinu en verðmæti aflans jókst um 67%. Loðnuaflinn minnkaði um 27% og nam samdráttur í verðmætum við fyrstu sölu saman um 3%. Kolmunnaaflinn nam 231 þúsund tonni og er það 45% meira en á fyrstu níu mánuðum ársins 2022, en verðmæti aflans jókst á sama tíma um 52%.

• Blogga um frétt