Vinnsla í húsnæði Þorbjarnar hf. í Grindavík er komin í gang eftir að allt stöðvaðist við rýmingu bæjarins 10. nóvember, en ekki er búið að ná fullum afköstum. Töluverðum hluta af afla útgerðarinnar er nú landað víðs vegar um landið og honum ekið til Grindavíkur.

„Vinnslan okkar í Grindavík er búin að vera í gangi í rúma viku, en við erum bara á 60% afköstum. Það vantar töluvert af fólki – margir farið til útlanda og fólk sem er of langt í burtu til að geta sótt vinnu. Við reiknum með að strax og heimilt verður fyrir fólk að gista í bænum gætum við komið verbúðunum í gang og fólk þá komið þangað. Þá gætum við farið að vinna á fullum afköstum,“ segir Gunnar Tómasson, framkvæmdastjóri Þorbjarnar, í viðtali í síðasta blaði 200 mílna.