Hafa ekki boðið upp minna magn í rúman áratug

Samdráttur í útgefnum aflaheimildum á undanförnum árum sést vel á því magni sem selt er í gegnum fiskmarkaði landsins og bendir flest til þess að heildarmagn sem fer í gegnum fiskmarkaðina í ár verði minnsta magn í rúman áratug, að sögn Bjarna Rúnars Heimissonar, framkvæmdastjóra Reiknistofu fiskmarkaða (RSF). Tækifæri eru þó í því að auka magn af nýjum tegundum, svo sem laxi.

Í viðtali í síðasta blaði 200 mílna segir hann: „Við seldum 105 þúsund tonn í fyrra og 115 þúsund tonn árið þar áður. Þetta er tíu þúsund tonna lækkun milli 2021 og 2022. Þetta verður líklega rúmlega fimm þúsund tonnum minna magn á þessu ári en í fyrra. Fiskmarkaðirnir hafa selt um 92.500 tonn það sem af er ári. Við munum enda aðeins ofar en árið 2011 þegar 91 þúsund tonn voru seld á mörkuðunum.“