Komu biluðum smábáti til bjargar

Rétt fyrir klukkan ellefu í gærkvöldi barst hjálparbeiðni frá skipverja smábáts sem þá var staddur skammt undan Álftanesi og var í vélarvandræðum. Vél bátsins ofhitnaði við áreynslu, og taldi skipverji ekki óhætt að halda áfram fyrir eigin vélarafli.

Þetta kemur fram í fréttatilkynningu frá Landsbjörg.

Björgunarbátarnir Fiskaklettur úr Hafnarfirði og Sædís frá Kópavogi voru kallaðir út og héldu á vettvang. Sjólag  er sagt hafa verið ágætt, en gekk á með éljum.

Um fimmtán mínútur fyrir miðnætti voru viðbragðsaðilar komnir að smábátnum sem var tekinn í tog af Sædísi. Haldið var til Hafnarfjarðar, en báturinn var á leið þangað. Ferðin gekk vel og var lagt við bryggju í Hafnarfirði eftir um klukkutíma siglingu.

„Vel gekk að koma bilaða bátnum að bryggju,“ segir í tilkynningunni og lauk aðgerðum rétt rúmlega eitt í nótt, þegar Sædís var komin til heimahafnar.

• Blogga um frétt