Örvar SH verður Núpur BA

Nýr bátur í útgerð Odda hf. á Patreksfirði, sem fær nafnið Núpur BA 69, kom til heimahafnar á laugardag. „Við setjum bátinn í okkar liti og merkjum upp á nýtt strax þegar veður leyfir,“ segir Skjöldur Pálmason framkvæmdastjóri Odda í samtali við Morgunblaðið.

Fyrirtækið skiptir út eldri báti fyrir þennan nýja sem áður var Örvar SH 777 í eigu og útgerð Hraðfrystihúss Hellissands.

Frétt af mbl.is

Oddi á Patreksfirði festir kaup á Örvari

Núpur hinn nýi, ef svo má segja, er tæplega 690 brúttótonn, 43,2 metra langur og smíðaður í Noregi árið 1992. Báturinn er sérbúinn til veiða á línu. „Við sérhæfum okkur í línuveiðum, því þannig fáum við besta hráefnið – þorsk og ýsu. Þetta er vara sem svo er flutt fersk utan til viðskiptavina bæði í Evrópu og Bandaríkjunum,“ segir Skjöldur.

Eldra skip, Núpur BA sem smíðaður var 1977, fer nú á söluskrá. Áhöfnin sem þar var fer á nýjan Núp og byrjar róðra strax eftir áramót. Skipstjóri er Bjarni Jónsson og með honum valinn maður í hverju rúmi.