Opna frumkvöðlasetur í gamla Landsbankahúsinu
Setja bókamerki
Frændurnir Þorsteinn Már Baldvinsson forstjóri Samherja og Kristján Vilhelmsson, framkvæmdastjóri útgerðarsviðs Samherja, hafa stofnað saman félag um uppbyggingu frumkvöðla- og nýsköpunarstarfs í Eyjafirði. Félagið, Drift EA, mun hafa aðsetur í gamla Landsbankahúsinu við Ráðhústorg en húsnæðið er í eigu fjárfestingafélagsins Kaldbaks.
Þeir Þorsteinn Már og Kristján segja í samtali við Morgunblaðið að nú í desember séu liðin 40 ár frá því að gengið var frá kaupum á Samherja og togaranum Guðsteini GK breytt í Akureyrina EA. Allan þann tíma hefur meginþorri starfsemi Samherja farið fram á Eyjafjarðarsvæðinu en með stofnun Driftar EA vilji þeir sýna íbúum og fyritækjum á svæðinu þakklæti.
„Við viljum skapa þarna vettvang fyrir frumkvöðla og fyrirtæki til að vinna hugmyndum sínum framgang og styðja þannig við uppbyggingu á svæðinu,“ segir Þorsteinn Már.
Kristján bætir við að grunnurinn að starfsemi Samherja byggist á frumkvöðlastarfsemi.
„Með uppbyggingu frumkvöðlaseturs skapast tækifæri til að byggja upp ný fyrirtæki sem munu vonandi eiga merkilega sögu að baki eftir 40 ár,“ segir Kristján.
Ekki liggur fyrir hversu miklu fjármagni þeir Þorsteinn Már og Kristján muni verja í starfsemi Driftar EA, ætla má að um töluverða fjármuni sé að ræða. Stefnt er að því að félagið hefji starfsemi á fyrri hluta næsta árs.
Trump tekinn við sem forseti Bandaríkjanna
Játaði allt á fyrsta degi
Vara við svindli í Zagreb
Ganga í hús sem á að rýma á Seyðisfirði
Aflétta rýmingu ef spá gengur eftir
Óvenjuleg virkni sem getur leitt til eldgoss
Fjöldi staura brotnaði og línur slitnuðu