Starfsfólki fjölgað um 40% og stefnir í metár

Reynir B. Eiríksson er framkvæmdastjóri Vélfags og segir hann í viðtali í desemberblaði 200 mílna að í dag starfi 36 manns hjá félaginu: „Á þessu ári hefur starfsfólki fjölgað um 40%, m.a. til að geta annað betur eftirspurn og líka til að auka skipulag í daglegum rekstri. Það stefnir í metár í rekstri Vélfags, en velta hefur aukið talsvert á árinu sem er að líða. Hjónin Bjarmi Sigurgarðarsson og Ólöf Ýr Lárusdóttir sem stofnuðu félagið hafa um langt skeið verið allt í öllu og í senn gegnt hlutverki framkvæmdastjóra, fjármálastjóra, og sölustjóra en með nýju starfsfólki verður til meiri verkaskipting og munu þau Bjarmi og Ólöf þá geta helgað sig betur vöruþróun þar sem kraftur þeirra og hugvit nýtist best.“

Vélfag hefur bætt við sig fjölda nýrra starfsmanna að undanförnu og stefnir í að reksturinn slái öll met á þessu ári.

Einn fyrir alla

Nýjasta varan er vélin Uno en eins og nafnið er vísbending um er þar á ferðinni alhliða vél sem getur leyst fjórar eða fimm fiskvinnsluvélar af hólmi. „Uno felur í sér byltingu fyrir vinnslu á hvítum fiski því bæði styttir hún ferli fisksins í gegnum vinnsluna og notar nýstárlega nálgun við að fjarlægja beingarðinn,“ segir Reynir.

Hönnun Uno fórnar ekki afköstum en dregur samt sem áður úr rekstrarkostnaði s.s. með því að nota færra starfsfólk, minna pláss og minna vatn. „Leið fisksins í gegnum kerfið er styttri og þarf því ekki að sprauta eins miklu vatni á færibönd og aðra vélarhluta. Hvað hagkvæmnina snertir er Uno að haka við öll boxin,“ segir Reynir.

Sem fyrr segir verður fyrsta Uno-vélin afhent í Noregi en nýverið var gengið frá samningi við Brim um fyrstu Uno-vélina sem sett verður upp innanlands. „Það er Kambur, dótturfélag Brims, sem kaupir fyrstu vélina og hefur forkaupsrétt að fimm Uno-vélum til viðbótar. Er óhætt að segja að Uno hafi fengið mjög góð viðbrögð og ljóst að margir kaupendur bíða spenntir eftir að kynna sér tæknina nánar og vonandi kaupa af okkur vélar.“

Viðtalið við Reyni má lesa í heild sinni í desemberblaði 200 mílna.