Það er álit umboðsmanns Alþingis að útgáfa reglugerðar Svandísar Svavarsdóttur, sem bannaði tímabundið hvalveiðar síðasta sumar, hafi ekki samræmst kröfum um meðalhóf og hafi ekki átt sér nægilega skýra stoð í lögum.

Þetta kemur fram í áliti umboðsmanns Alþingis sem birt hefur verið í dag.

Svandís tilkynnti í júní að hún hefði tekið „ákvörðun um að stöðva hval­veiðar tíma­bundið í ljósi af­drátt­ar­lauss álits fagráðs um vel­ferð dýra. […] Skil­yrði laga um vel­ferð dýra eru ófrá­víkj­an­leg í mín­um huga, geti stjórn­völd og leyf­is­haf­ar ekki tryggt kröf­ur um vel­ferð á þessi starf­semi sér ekki framtíð.“

Frétt af mbl.is

Veiðar á langreyðum stöðvaðar

Hvalur hf. mótmætli harðlega ákvörðun ráðherra sem og Verkalýðsfélag Akraness, en fyrirtækið sagðist ætla að leita réttar síns og sendi m.a. erindi til umboðsmanns Alþingis.

Skúli Magnússon, umboðsmaður Alþingis, segist í dag hafa komist að þeirri niðurstöðu að breytingar sem gerðar voru á reglugerð um hvalveiðar „hafi ekki átt sér nægilega skýra stoð í 4. gr. laga nr. 26/1949, um hvalveiðar eins og sú grein verður skýrð með hliðsjón af markmiðum sínum, lagasamræmi og grunnreglum stjórnskipunarréttar um vernd atvinnuréttinda og atvinnufrelsis“.

„Án tillits til þessarar niðurstöðu tel ég einnig með hliðsjón að aðdraganda og undirbúningi reglugerðarinnar, svo og réttmætum væntingum Hvals hf., að útgáfa hennar hafi ekki, við þær aðstæður sem uppi voru, samrýmst kröfum um meðalhóf eins og þær leiða af almennum reglum stjórnsýsluréttar.“

Dómstóla að rétta hlut Hvals hf.

Þrátt fyrir þetta telur umboðsmaður Alþingis ekki ástæðu til að beina sérstökum tilmælum um úrbætur til ráðherra þar sem „það ástand sem leiddi af útgáfu reglugerðarinnar er liðið“.  Þó beinir Skúli því til ráðherra að hafa sjónarmiðin sem fram koma í áliti umboðsmanns í huga til framtíðar.

Sérstaklega er tekið fram að í niðurstöðunni er ekki tekin afstaða til hugsanlegra „einkaréttarlegra afleiðinga hinna ólögmætu stjórnvaldsfyrirmæla.“ Vegna þessa telur umboðsmaður ekki forsendur til að beina tilmælum til ráðherra um að leita leiða til að rétta hlut Hvals hf. enda sé það verkefni dómstóla.

Fréttin hefur verið uppfærð.

Tengdar fréttir

Hvalveiðar

Óvíst hvort umsóknir verði afgreiddar fyrir kosningar

• Mál Black Cube ekki á borði ríkissaksóknara
• Fjögur fyrirtæki sótt um leyfi til hvalveiða
• Fátt um svör vegna Black Cube
• „Er í mínum huga engin frétt“

» Fleiri tengdar fréttir

• 1 blogg um fréttina

Bloggað um fréttina

• Örn Gunnlaugsson: Safna í sparibaukinn.