Orðrómur um að hvalveiðar færist frá Svandísi
Setja bókamerki
Þorbjörg Sigríður Gunnlaugsdóttir, þingmaður Viðreisnar, segir að hún muni styðja vantrauststillögu gegn matvælaráðherra verði hún lögð fram.
Hún segir umræður vera á þinggöngum varðandi það hvort að hvalveiðar verði mögulega fluttar úr matvælaráðuneytinu sem möguleg lausn fyrir Sjálfstæðisflokkinn og Framsókn.
„Ég er auðvitað bara þingmaður í stjórnarandstöðu en þetta er eitthvað sem er verið að ræða inn í þinghúsi þegar fólk er að velta því fyrir sér eftir hverju Sjálfstæðisflokkur og Framsókn séu að bíða.
Ég sé ekki fyrir mér að þetta sé lausn sem dugi sjálfstæðismönnum miðað við þann þunga sem er í málinu,“ segir Þorbjörg í samtali við mbl.is.
Störukeppni á milli Sjálfstæðisflokks og VG
Hún segir það koma sér á óvart að ekki skuli vera komin niðurstaða í þetta mál.
„Það er hálfur mánuður frá því að þetta álit umboðsmanns kom fram. Það er auðvitað ekki sá möguleiki í stöðunni að það taki hálfan mánuð að lesa þann texta.“
Hún segir að virðist vera sem svo að mikill pólitískur ágreiningur sé í ríkisstjórninni. Áhugavert sé að fylgjast með því að orðsendingar á milli stjórnarliði fari núna fram í fjölmiðlum, en ekki á bak við luktar dyr.
„Mér sýnist þetta bara vera störukeppni, aðallega á milli Sjálfstæðisflokks og Vinstri grænna.“
Mun styðja vantrauststillögu
Þingflokkur Viðreisnar mun funda sérstaklega ef vantrauststillaga kemur fram og liggur ekki fyrir hvað allir þingmenn Viðreisnar muni kjósa. Þorbjörg mun þó greiða atkvæði með vantrausti ef slík atkvæðagreiðsla fer fram.
„Ég mun styðja þetta vantraust. Eftir að hafa lesið álitið og kannski ekki síður eftir að hafa heyrt viðbrögð ráðherrans sjálfs. Manni finnst töluverður ásetningur í þessu lögbroti hjá henni,“ segir Þorbjörg.
Á Facebook tjáði Þorbjörg sig einnig og spurði þar: „Hvaða lög brutu hvalirnir?“
„Bjarni axlaði ábyrgð á áliti umboðsmanns á sínum tíma með því að flytja sig yfir í annað ráðuneyti. Það þótti fyndið að ætla að axla ábyrgð með því að skipta bara um ráðherrastól. Svandís gengur samkvæmt þessu lengra en Bjarni og ætlar ekki að flytja sig heldur ætlar hún að flytja hvalina,“ segir hún á Facebook.
Beint: Ný ríkisstjórn á Bessastöðum
Nágrannaþjóðir upplýstar en við vöðum í blindni
Stormur á Þorláksmessu en víðast hvar stefnir í hvít jól
Ók á hóp fólks á jólamarkaði: Einn látinn
„Börn heima sem maður myndi vilja hafa í skjóli“
Bein útsending: Ríkisstjórnarsamstarfið kynnt
Ný ríkisstjórn kynnt á morgun
„Óviðunandi eftirlit með börnum“
