Fleiri skip hætta veiðum vegna veðurs

Veður hefur truflað kolmunnaveiðar í færeysku lögsögunni undanfarið og bendir flest til að það haldi áfram næstu daga. Hafa því nokkur skip hætt kolmunnaveiðum í bili. Enn eru 273 þúsund tonn af kolmunnakvótanum óveidd.

Hoffell SU er statt rétt utan Fáskrúðsfjarðar og mun landa þar 930 tonnum af kolmunna, en skipið hefði haldið áfram veiðum ef veðurskilyrði hefðu verið betri, að því er fram kemur á vef Loðnuvinnslunnar.

Ölduhæð í kringum Færeyjar er nú á bilinu sex til átta metrar og hefur verið nokkuð hvassviðri, um þrettán til fjórtán metrar á sekúndu. Langtímaspá gerir ráð fyrir áframhaldandi leiðindaveðri fram í næstu viku og mun vindhraðinn hækka mest í 17 metra á sekúndu.

Vilhelm Þorsteinsson og Margrét hætt

Þá landaði Vilhelm Þorsteinsson EA 1.100 tonnum af kolmunna á Seyðisfirði í byrjun vikunnar en Margrét EA landaði 1.400 tonnum í Neskaupstað mánudagskvöld. Bæði skipin eru gerð út af Samherja og munu þau hafa hætt kolmunnaveiðum að sinni, að því er fram kom í færslu á vef Síldarvinnslunnar.

Þar segir að kolmunnaveiðarnar hafi verið að fjara út vegna veðurs. Uppsjávarskip Síldarvinnslunnar, Barði NK, Beitir NK og Börkur NK eru þó enn á miðunum.

Vilhelm Þorsteinsson EA hefur hætt kolmunnaveiðum í bili. Ljósmynd/Þórhallur Jónsson

„Verksmiðjurnar í Neskaupstað og á Seyðisfirði hafa hvor um sig tekið á móti 6.000 – 7.000 tonnum og kolmunninn hefur verið afar gott hráefni til vinnslu. Í Neskaupstað er samhliða vinnslunni verið að setja upp tæki í nýja og endurbætta verksmiðju og einmitt núna er verið að undirbúa uppsetningu á nýjum þurrkara þannig að þar er býsna mikið um að vera,“ segir Hafþór Eiríksson, rekstrarstjóri fiskimjölsverksmiðja Síldarvinnslunnar, í færslunni.

• Blogga um frétt