Innleidd hefur verið skjáveggjastýring á Margréti EA-170, uppsjávarskipi Samherja, og hefur því fylgt umtalsverðar breytingar í brú skipsins. Getur skipstjórinn nú stjórnað og fylgst með hvaða tæki sem er um borð á stórum skjáum.

„Með þessu kerfi er hægt að draga yfir á skjáina öll þau tæki sem verið er að vinna með hverju sinni, hvort sem við erum á veiðum eða siglingu. Í gamla kerfinu vorum við með um tíu tölvumýs en núna er öllu stjórnað með einni mús, sem er mikill kostur. Myndirnar eru auk þess mun skýrari en á gömlu tækjunum, enda voru þau komin nokkuð til ára sinna., segir Hjörtur Valsson skipstjóri á Margréti í færslu á vef Samherja.

Hann segir ótrúlega vel hafi gengið að setja upp skjáveggjastýringuna. „Allar skipanir í kerfinu eru því mun auðveldari og svo munar miklu að geta sett upp mismunandi sviðsmyndir og haft alla þætti svo að segja á sama staðnum. Allt þetta gerir vinnuaðstöðuna þægilegri og öruggari.“

Margrét EA. mbl.is/Þorgeir

Margrét var smíðuð árið 2007 og er því orðin hálf tvítug. Það var kominn tími á uppfærslu þótt eldri búnaður hafi þjónað áhöfninni vel að sögn Hjartar.

„Við getum alveg hiklaust talað um byltingu í þessum efnum og uppsetningin gekk ótrúlega vel. Í byrjun desember leit út fyrir að skipið yrði í höfn í einhverjar vikur og þá var ákveðið að vaða í þetta verkefni og er skemmst frá því að segja að veggurinn var kominn upp rúmum þremur vikum síðar, sem er í raun ótrúlegt. Allir brettu upp ermarnar og létu verkin tala, að sjómanna sið. Við höfum farið í tvær veiðiferðir eftir að þetta nýja kerfi var sett upp og gaman að segja frá því að allt saman virkaði svo að segja hundrað prósent í fyrsta túrnum, það var í raun sáralítið sem þurfti að lagfæra. Þetta sýnir og sannar hversu vel við búum hérna á Akureyri varðandi slíka þjónustu.“

Flókin framkvæmd

Fram kemur í færslunni að Kristinn Daníelsson hjá Samherja hafi haft yfirumsjón með verkefninu og leitað var til fyrirtækjanna ELAK, M-tech, N.Hansen og Trésmiðjunnar Ýmis. Öll eru þessi fyrirtæki á Akureyri og hafa tekið að sér margvísleg verkefni fyrir Samherja og tengd félög í áranna rás.

„Það er frekar flókið að setja upp svona kerfi og þá er auðvitað lykilatriði að hafa samhentan mannskap sem veit nákvæmlega hvað snýr upp og niður í þessum fræðum. Skjáveggjastýringin í Margréti EA er svipuð þeirri sem er í Vilhelm Þorsteinssyni EA 11, sem hefur reynst mjög vel og svona kerfi eru líklega í flestum nýrri skipum flotans. Ég er afskaplega ánægður útkomuna og hlakka til næstu veiðiferðar,“ segir Hjörtur.

Elling Guðmundsson rafmagnstæknifræðingur hjá ELAK kom að uppsetningu kerfisins. Ljósmynd/Samherji

Tengdar fréttir

Samherji

Sumarstarfsmenn gegna lykilhlutverki hjá ÚA

• Björgvin kominn til Spánar
• Hagnaður Samherja minnkaði eftir uppstokkun
• Mikilvægt að treysta viðskiptasamböndin
• Söfnuðu mottum og hálfri milljón

» Fleiri tengdar fréttir

• Blogga um frétt