Féll í sjóinn úr léttabát Herjólfs

Einn maður úr þriggja manna áhöfn léttabáts Herjólfs féll útbyrðis þegar eldur varð laus í vélarrúmi bátsins. Maðurinn náðist aftur um borð.

Þetta kemur fram í tilkynningu frá Slysavarnafélaginu Landsbjörg. 

Fram kemur að Herjólfur hafi verið á leið úr Landeyjahöfn til Vestmannaeyja. Ferðin var notuð til að æfa notkun léttabátsins.

Þegar maðurinn féll útbyrðis var björgunarskipið Þór kallað út á hæsta forgangi og hélt úr höfn í Vestmannaeyjum, til móts við Herjólf og léttabátinn.

Toglína var sett í léttabátinn og hann fluttur til Vestmannaeyja. Ljósmynd/Landsbjörg

Björguðu félaga sínum úr sjónum

Í tilkynningunni segir að þegar Þór kom á staðinn, nokkrum mínútum eftir útkall, höfðu þeir tveir sem voru um borð í léttabátnum náð félaga sínum sem féll útbyrðis aftur um borð.

Áhöfninni tókst einnig að slökkva eldinn með slökkvikerfi í vélarrúmi hans. Engin hætta var því lengur á ferðum.

„Áhöfn léttabátsins var tekin um borð í Þór og áhöfnin kom toglínu í léttabátinn. Þór hélt svo með léttabátinn í togi til hafnar í Vestmannaeyjum. Þeir þrír sem voru um borð í léttabátnum voru fluttir með sjúkrabíl til skoðunar á sjúkrahúsi Vestmannaeyja, að eigin ósk.“

Að lokum segir í tilkynningunni að gott veður og sjólag hafi verið á staðnum og aðgerðir gengið vel. Þór var lagstur að bryggju og verkefni lokið um 45 mínútum eftir að lagt var úr höfn.

• Blogga um frétt