„Hjólin eru farin að snúast“

Það var mikið líf og fjör á Grindavíkurhöfn í dag þegar fiskiskipið Vésteinn GK landaði einum tólf tonnum af fisk, fyrst fiskiskipa til að landa í Grindavík síðan 11. janúar. 

„Það er mjög gott að koma hérna,“ segir Guðmundur Theódór Ríkharðsson, skipstjóri á Vésteini, spurður hvernig tilfining það sé að landa aftur í Grindavík. 

Það var mikill gleði þegar fiskiskipið Vésteinn landaði í Grindavík fyrst skipa síðan 11. janúar. Eggert Johannesson

Frétt af mbl.is

Landa í Grindavíkurhöfn meðan náttúran leyfir

Búinn að bíða lengi eftir þessum degi 

Aðspurður segir Guðmundur aflann hafa talið ein tólf tonn. „30 kör af þorski og á þriðja kar af ýsu,“ segir hann glaður í bragði og bætir við að hann sé búinn að bíða lengi eftir þessum degi, enda ekki landað í Grindavík síðan á síðustu verktíð. 

Þú hefur væntanlega aldrei fengið jafn höfðinglegar móttökur hér eins og nú? Það eru bara allir mættir á bryggjuna

„Já heldu betur, þetta er skemmtilegt.“

Afli Vésteins taldi ein tólf tonn, eða 30 kör af þorski og á þriðja kar af ýsu. mbl.is/Eggert Jóhannesson

Eykur bjartsýni og þor

Með Guðmundi á höfninni var Stefán Kristjánsson, eigandi Einhamar Seafood. Stefán var yfir sig glaður með fyrstu löndunina síðan 11. janúar og sagði hana hafa gríðarlega mikla þýðingu fyrir sveitarfélagið. 

„Þetta eykur bjartsýni og þor. Hjólin eru farin að snúast.“

Á það sama við um Einhamar? 

„Já! Við vorum að slægja í gær. Síðan tökum við þennan afla, slægjum hann í fyrramálið og byrjum síðan að flaka,“ segir Stefán og bætir við að síðan komi bara helgi og starfsemin hefjist á ný á mánudag. 

Þannig að það er nóg framundan?

„Jájájá, það er bara vertíð í fullum gangi, stórþorskurinn er á grunnslóð og kominn til að hrigna, þannig að það er líf og fjör í Grindavík.“ 

Margir lögðu leið sína á höfnina til að fylgjast með fyrstu lönduninni síðan í janúar. mbl.is/Eggert Jóhannesson

• Blogga um frétt