Halda á Írlandsmið með von um mokveiði

Mokveiði hefur verið á kolmunnamiðunum undan Írlandi og sigla þangað bæði Beitir NK og Börkur NK í kvöld. Siglingin tekur um þrá sólarhringa en leiðin frá Neskaupstað á miðin vestur af Írlandi er um 700 sjómílur.

„Þarna hefur verið alger mokveiði og reyndar hefur einnig verið mikil veiði nokkru sunnar. Þarna eru afar þéttar lóðningar og menn þurfa að gæta að sér við veiðarnar. Við munum vera með minni troll en venjulega og sterkari poka og belgi. Það reynir gríðarlega á veiðarfærin við svona aðstæður. Skipin eru jafnvel að draga í einungis 3 – 5 mínútur í þéttustu lóðningunum þarna. Þetta er svo sannarlega aðgæsluveiði,“ er haft eftir Tómasi Kárasyni skipstjóra á Beiti í færslu á vef Síldarvinnslunnar.

„Vonandi verður áframhald á góðri veiði á þessum slóðum, allavega er mikið af fiski þarna á ferðinni. Annars erum við ekki búnir að gefa loðnuvertíð upp á bátinn. Það er aldrei að vita nema eitthvað birtist og kannski fáum við gusu inn á Húnaflóadýpið eins og gerðist á síðasta ári. Menn eiga að vera bjartsýnir,“ segir Tómas.

• Blogga um frétt