Grásleppuveiðum flýtt og hefjast á föstudag
Setja bókamerki
Grásleppuveiðar hefjast föstudaginn 1. mars, sem er mun fyrr en venja er. Katrín Jakobsdóttir forsætisráðherra hefur undirritað reglugerð þess efnis sem staðgengill matvælaráðherra.
Ákvörðunin kemur í kjölfar beiðni Landssambands smábátaeigenda (LS) um að flýta upphafsdegi veiðanna. Hafði sambandið sent matvælaráðuneytinu bréf í síðustu viku þar sem óskað var eftir því að grásleppuveiðar myndu hefjast fyrr.
„Megin ástæða beiðninnar er að á undanförnum árum hefur markaður fyrir fersk grásleppuhrogn í Danmörku farið vaxandi. Samfara hefur útflutningur héðan aukist jafnt og þétt og skilað góðu verði til sjómanna og útflytjenda. Markaðurinn er þó enn takmarkaður við tímann frá áramótum og fram að páskum. Þar sem páskar eru mjög snemma í ár, páskadagur 31. mars, er hætt við að íslenskir sjómenn geti ekki nýtt sér eða annað markað fyrir fersk grásleppuhrogn hefjist vertíðin 20. mars. Auk hrogna frá Íslandi selja danskir og sænskir sjómenn hrogn sín inn á þennan markað,“ sagði í bréfinu.
Nokkrar breytingar á veiðum
Á vef sínum vekur LS athygli á því að í reglugerðinni eru nokkrar breytingar frá fyrri tilhögun veiðanna.
Hvert veiðileyfi er gefið út til 25 samfelldra veiðidaga en í nýju reglugerðinni er hver löndun talin sem einn dagur og dregst þannig frá samfelldum dögum.
Þá er skylt að draga grásleppunet eigi síðar en tveimur sólarhringum eftir að þau eru lögð í sjó. Skulu net dregin upp og geymd ef útlit er fyrir að ekki sé hægt að draga næstu tvo sólarhringa. Jafnframt er óheimilt að vera með fleiri net í sjó en svo að hægt sé að draga þau upp í einni veiðiferð.
Enn eru grásleppuveiðar leyfisskyldar en fyrir Alþingi liggur frumvarp um kvótasetningu veiðanna. Ekki er ljóst hvenær eða hvort frumvarpið fæst afgreitt, en litlar líkur eru á að frumvarpið hafi áhrif á grásleppuveiðar á þessu ári.
„Ekkert samtal sem hefur átt sér stað“
Segir umræðuna storm í vatnsglasi
Ótrúleg atburðarás: 25 dagar frá kappræðum
Segir aðferðafræði Seðlabankans ekki að virka
Segir af sér vegna tilræðisins
Framkvæmdir í uppnámi
„Þau eru ónæm fyrir alvarleika málsins“
Hefur tryggt sér stuðning nógu margra kjörmanna