Norsk markaðssetning skilar ágætu verði

Norðmenn hafa um árabil markaðsett atlantshafsþorsk úr Barentshafi sem einstaka norska afurð sem aðeins fæst janúar til apríl á ári hverju. Meðalverð það sem af er ári hefur verið 1.090 íslenskar krónur fyrir hvert kíló, að því er fram kom í umfjöllun 200 mílna.

Á þessum árstíma gengur þorskur úr Barentshafi að strandlengju Noregs til að hrygna við Lófót og Finnmörk. Norðmenn hafa markaðssett þennan fisk sem sérstaka vöru undir heitinu „skrei“ og fullyrðir sjávarafurðaráð Noregs (Norges Sjømatråd) að hin langa hrygningarganga fisksins geri hold fisksins „einstaklega fínt og þétt þannig að fiskurinn flagni fínlega þegar hann er eldaður“.

Markaðssetningin er svo vel heppnuð hjá þessum frændum Íslendinga að varan hefur orðið mjög eftirsótt á þeim árstíma sem skrei, sem er raunar bara atlantshafsþorskur, fæst keypt. Veiðitímabilið nær frá janúar til apríl.

Á síðasta ári seldu Norðmenn skrei á erlenda markaði fyrir 281 milljón norskra króna, sem jafngildir um 3,6 milljörðum íslenskra króna. Í magni er þetta ekki ýkja mikið, aðeins 4.189 tonn. Gerir það um 67 norskar krónur á kíló að meðaltali, eða 871 íslenska krónu, sem var veruleg hækkun frá árinu 2022 þegar meðalverð var 53,5 norskar krónur. Það sem af er ári hafa Norðmenn selt 601 tonn af skrei fyrir um 50 milljónir norskra króna og er meðalverð nú um 83,2 norskar krónur á kíló. Það er 24% aukning frá síðasta ári og 55,5% aukning frá árinu 2022.

Umfjöllunina má finna í heild sinni í síðasta blaði 200 mílna.