Hafrannsóknastofnun leggur til að humarveiðar verði bannaðar árin 2024 og 2025, að því er segir í ráðgjöf stofnunarinnar sem birt var í dag. Þá leggur stofnunin jafnframt til að áfram verði bannað að veiða með botnvörpu á afmörkuðum svæðum í Breiðamerkurdjúpi, Hornafjarðardjúpi og Lónsdjúpi til verndar humri.

Humarveiðar hafa verið bannaðar frá árinu 2022 vegna slakrar stöðu humarstofnsins og telur Hafrannsóknastofnun stofnstærðina vera undir varúðarmörkum.

Á síðasta ári tilkynnti stofnunin að vísbending væri um að humarstofninn hefði tekið að vaxa þar sem talning humarhola sýndi að fjöldi þeirra hafði tvöfaldast frá árinu 2021. Humarinn vex þó hægt og mun því taka nokkurn tíma áður en stofninn sé nógu stæðilegur til að réttlæta veiðar.

Frétt af mbl.is

Tilkynna vísbendingar um vaxandi stofn humars

Tvísýnt þrátt fyrir aukningu

„Aukning humarhola getur stafað af tvennu. Annars vegar er talið að humarholur séu greinanlegar frá því að dýrin eru um 17 mm á skjaldarlengd, sem samsvarar um þriggja ára humri, en í humarvörpu sést hann yfirleitt ekki fyrr en um 4–5 ára (25–34 mm á skjaldarlengd). Hins vegar að þegar álag á veiðislóð er lítið þá séu humarholur, sem ekki eru í ábúð, greinanlegri í lengri tíma og getur það valdið skekkju á mati á heildarfjölda humars,“ segir í ráðgjafarskjali Hafrannsóknastofnunar.

Ráðgjöf Hafrannsóknastofnunar um hámarksafla í humri hefur dregist saman á hverju fiskveiðiári frá fiskveiðiárinu 2009/2010, en þá var ráðgjöfin 2.200 tonn og nam humarafli íslenskra báta 2.456 tonn það fiskveiðiár.

Tengdar fréttir

Humarveiðar

„Við höfum ekkert gaman af svartsýni“

• Tilkynna vísbendingar um vaxandi stofn humars
• Humarinn mjög kresinn á búsvæði
• Uppbygging humarstofnsins mun taka mörg ár
• Ráðgjöf um stopp er ekki óvænt

» Fleiri tengdar fréttir

• Blogga um frétt