Betri horfur fyrir fiskinn í Ameríku

„Um­skipt­in sem ég sá og skynjaði í banda­rísku sam­fé­lagi komu þægi­lega á óvart og lofa góðu. Deyfð, drungi og sam­drátt­ar­ein­kenni í efna­hags­lífi í Bost­on og ná­grenni í mars í fyrra höfðu vikið fyr­ir mjög aukn­um um­svif­um og bjart­sýni. Ég kom því heim núna með allt aðra og betri til­finn­ingu í mag­an­um en gera mátti ráð fyr­ir,“ seg­ir Al­bert Erlu­son, fram­kvæmda­stjóri Hólma­skers ehf., í færslu á vef Vinnslu­stöðvar­inn­ar.

Al­bert var viðstadd­ur sjáv­ar­ú­vegs­sýn­ing­ar­inn­ar í Bost­on á dög­un­um en hún er sú stærsta sem hald­in er í Norður-Am­er­íku.

„Við styrkt­um viðskipta­sam­bönd og hitt­um líka full­trúa fyr­ir­tækja sem vant­ar fisk til að selja, bæði fersk­an og fros­inn. Þar gætu orðið við ný viðskipta­tengsl. Ég hef staðreynt um ára­bil mik­inn stöðug­leika á markaði með fisk í Banda­ríkj­un­um og það á bæði við um magn og verðlag. Und­an­far­in ár hef­ur fisk­verð hins veg­ar sveifl­ast meira en dæmi eru um áður. Ekki er auðvelt að greina ástæðuna en ég hef mín­ar kenn­ing­ar um það,“ seg­ir hann.

Vinnslu­stöðin og dótt­ur­fé­lög henn­ar, Leo Sea­food og Hólma­sker, voru á sýn­ing­unni und­ir merkj­um VSV Sea­food Ice­land í þjóðarskála sem Íslands­stofa skipu­lagði. Alls voru í Bost­on fleiri en 1.200 sýn­end­ur frá 49 að kynna vör­ur sín­ar, tæki og tól og ræða sam­an á mál­stof­um og ráðstefn­um af öllu tagi.

Sjáv­ar­út­vegs­sýn­ing­in í Bost­on er afar vin­sæl. Ljós­mynd/​Vinnslu­stöðin

Helsti markaður Hólma­skers

Í Banda­ríkj­un­um er helsta markaðssvæði Hólma­skers og nær það New York, Massachusetts, New Hamps­hire og Maine. Einnig skip­ar Flórída mik­il­væg­an sess í sölu fé­lags­ins vest­ur um haf. Það er fyrst og fremst flökuð ýsa sem seld er til viðskipta­vina í Banda­ríkj­un­um.

Aðalviðskipta­vin­ur­inn lengst af er og hef­ur verið High Liner Food, kanadískt fyr­ir­tæki sem fimm bræður stofnuðu um salt­fisk­verk­un í Nova Scotia á Ný­fundna­landi 1899 og er nú stærsti selj­andi til­bú­inna, fros­inna sjáv­ar­rétta til stór­markaða og þjón­ustu­fyr­ir­tækja í veit­ing­a­rekstri í Banda­ríkj­un­um.

Til­kynnt var 2021 um kaup Vinnslu­stöðvar­inn­ar á 75% hlut í fisk­vinnsl­unni Hólma­skeri sem starf­rækt er í Hafnar­f­irði og gegn­ir vinnsl­an nú mik­il­vægu hlut­verki í sam­stæðu Vinnslu­stöðvar­inn­ar. Fram kem­ur í færsl­unni að 75% til 80% ýs­unn­ar sem flökuð er og seld frá Hólma­skeri á ár­inu 2024 ber­ist af skip­um Vinnslu­stöðvar­inn­ar en 20-25% séu keypt á markaði.

Frétt af mbl.is

Synda gegn straumn­um og veðja á hand­flök­un

Starfs­menn Hólma­skers eru um 40 og fram­leiða ár­lega um 4.000 tonn af fiski. Flök­in fara vest­ur um haf fersk eða fros­in, flug­leiðis eða sjó­leiðis, til High Liner og áfram til þeirra sem kunna gott að meta á disk­un­um sín­um.

Áber­andi sveifl­ur

„Þegar við hóf­um starf­semi Hólma­skers var út­flutn­ing­ur til Banda­ríkj­anna svipaður og áður og verð afurða sömu­leiðis. Svo tók verð að hækka á COVID-tím­an­um og náði sögu­leg­um hæðum, allt að 20% yfir því sem dæmi voru um áður. Verðið hækkaði allt árið 2022 en lækkaði svo í skref­um á ár­inu 2023 og var um síðustu ára­mót orðið lægra en það var fyr­ir COVID,“ seg­ir Al­bert í færsl­unni.

Hann seg­ist aldrei hafa kynnst öðrum eins sveifl­um. „Verðhækk­un­ina skýri ég helst með pen­inga­prent­un og því að fólk hafði hægt um sig og ferðaðist ekki á COVID-tím­an­um. Það hafði óvenju mikla fjár­muni úr að spila og vildi gera vel við sig í mat. Svo gjör­breytt­ust aðstæður 2023. Pen­inga­prent­un var hætt, vext­ir hækkuðu, bens­ín­verð rauk upp, hús­hit­un­ar­kostnaður sömu­leiðis og öll mat­vara. Rekstr­ar­kostnaður fyr­ir­tækja jókst og kaup­mátt­ur fólks rýrnaði veru­lega.“

Nú eru horf­ur mjög já­kvæðar að sögn Al­berts og skipt­ir þar auk­in um­svif í efna­hags­líf­inu í Banda­ríkj­un­um mestu máli.

• Blogga um frétt