Hafna „umframbótum“ vegna vatnslagnar til Eyja
Setja bókamerki
Vinnslustöðin hafnar hugmyndum bæjarstjórnar Vestmannaeyjabæjar um einhverskonar umframbætur vegna tjóns sem varð á vatnslögn eftir að akkeri Hugins VE festist í henni í nóvember á síðasta ári. Bæjaryfirvöld benda á að tryggingafélag útgerðarinnar hefur viðurkennt bótaskyldu en að tjónið er umfram hámark vátryggingabóta.
„Vinnslustöðin hefur kappkostað að hafa vátryggingavernd sem uppfyllir allar kröfur sem eðlilegar geti talist. Okkur þykir miður ef tjónabæturnar duga ekki til að bæta tjónið að fullu en endanlegt mat tjónsins liggur ekki fyrir,“ sagði Guðmundur Örn Gunnarsson, stjórnarformaður Vinnslustöðvarinnar, á aðalfundi félagsins sem haldinn var í síðustu viku.
„Ef eigendur vatnsleiðslunnar hefðu vátryggt vatnsleiðsluna myndi sú vátrygging bæta það tjón umfram hið lögbundna hámark ef tjónið væri hærra,“ sagði hann.
Fordæmalausar „umframbætur“
Ræddi Guðmundur Örn málið undir liðnum skýrsla stjórnar og sagði hann um að ræða óhapp með „afleiðingar sem eigendur og stjórnendur Vinnslustöðvarinnar tóku nærri sér og lögðu sig eftir að draga úr skaðanum að svo miklu leyti sem þeim var unnt miðað við aðstæður.“
Benti hann á að félagið og öll fyrirtæki innan samstæðunnar séu tryggð gagnvart tjóni af ýmsu tagi í starfsemi sinni. „Vátryggingabætur eru greiddar samkvæmt gildandi skilmálum, lögum og alþjóðlegum samningum. […] Tryggingafélag Vinnslustöðvarinnar, VÍS, hefur viðurkennt bótaskyldu vegna vatnsleiðslunnar að tilteknu hámarki samkvæmt siglingalögum.“
Bæjarstjórn Vestmannaeyjabæjar samþykkti tillögu 21.mars síðastliðinn um að „leitast við, í samstarfi við HS Veitur, eiganda vatnsveitunnar, að sækja frekari bótagreiðslur til útgerðarinnar til að tryggja skaðleysi íbúa Vestmannaeyjabæjar vegna tjónsins.“
Fram kemur í fundargerð bæjarráðs Vestmannaeyjabæjar frá síðastliðnum föstudag (5. apríl) að fulltrúar bæjaryfirvalda og HS Veitna hyggjast funda með Vinnslustöðinni í þessari viku vegna frekari tjónabóta.
Í erindi sínu í síðustu viku sagði Guðmundur Örn að Vinnslustöðin hafi þegar svarað slíkum hugmyndum „og fellst ekki á erindið enda eru slíkar „umframbætur“ án fordæma að því er við best vitum og engan veginn í samræmi við þau lög og alþjóðasamninga sem um slík tjón gilda.“
Börn hafi engan rétt á leikskólakennslu
Yfir 300 stæði fóru undir hraun
Mjög alvarlegt ef Njarðvíkuræð gefur sig
„Má segja að þetta gos hafi þjófstartað“
Myndir: Grindavíkurvegur aftur undir hraun
„Erum í miðri hrinu“: Styttist í Eldvörp
Hraunið við bílastæði Bláa lónsins
Úlfar: Heppileg tímasetning á gosinu