Fyrsta erlenda sala Ístæknis til Gårdfisk

Sænska fyrirtækið Gårdfisk undirritaði í gær samning við Ístækni ehf. á Ísafirði um kaup á framleiddum búnaði frá íslenska, að því er fram kemur í fréttatilkynningu. Athygli vekur að um er að ræða fyrstu erlendu sölu Ístækni sem tók til starfa fyrsta desember síðastliðinn.

„Við hjá Ístækni ehf. erum mjög ánægðir að hafa náð samningi við Gårdfisk og erum spennt fyrir því að hjálpa þeim að þróast og stækka með þeirri þekkingu og reynslu sem við búum yfir. Vonandi mun þetta leiða til frekara samstarfs á komandi árum enda er Gårdfisk að gera áhugaverða hluti í landeldi í Svíþjóð,“ segir Jóhann Bæring Gunnarsson, framkvæmdastjóri Ístækni.

Í dag starfa 23 starfsmenn hjá Ístækni við þjónustu og framleiðslu á Ísafirði og segir í tilkynningunni að verkefnastaðan sé nokkuð góð næstu mánuði.

Ístækni var stofnað af fyrirverandi starfsmönnum Skagans 3X ásamt öðru áhugasömu fólki. Á síðasta ári festi nýstofnað félag tæki og framleiðslubúnað Skagans 3X á Ísafirði og um áramótin sameinaðist Vélsmiðjan Þristur ehf. Ístækni, en þristur hefur þjónustað sjávarútveginum á Vestfjörðum í fjóra áratugi.

Frétt af mbl.is

Ístækni kaupir eignir Skagans 3X á Ísafirði

• Blogga um frétt