Flutningaskip vélarvana út af Rifstanga

Erlent flutningaskip varð vélarvana um fjórar sjómílur út af Rifstanga í nótt.

Laust fyrir klukkan þrjú var þyrlusveit Landhelgisgæslunnar og sjóbjörgunarsveitir á vegum Slysavarnafélagsins Landsbjargar kallaðar út ásamt áhöfninni á varðskipinu Freyju.

Auk þess var íslenskt togskip sem var í nágrenninu beðið um að halda á staðinn.

Þetta kemur fram í tilkynningu Landhelgisgæslunnar.

Létu akkeri falla

Áhöfninni um borð í flutningaskipinu tókst að stöðva rek skipsins, sem stefndi í átt að landi, með því að láta akkeri þess falla.

Er skipið nú um þrjár sjómílur frá landi og akkeri þess halda. Vindur er hægur á staðnum og ölduhæð um tveir metrar. 

Mesta hættan liðin hjá

Þegar mesta hættan var liðin hjá voru sjóbjörgunarsveitir afturkallaðar ásamt togskipinu sem var til taks á staðnum.

Áætlað er að varðskipið Freyja verði komið á staðinn eftir hádegi en þá verður tekin ákvörðun með útgerð skipsins með hvaða hætti það verði dregið af staðnum. Þá er þyrlusveit Landhelgisgæslunnar í viðbragðsstöðu á Akureyri ef á þarf að halda.

• Blogga um frétt