„Lélegasta rallið sem ég tek þátt í“

Leifur EA 888 kom til hafnar í Grímsey um hádegisbil í dag með aðeins 1.110 kíló eftir síðustu veiðiferð sem báturinn fer í tengslum við netarall Hafrannsóknastofnunar. Gylfi Gunnarsson, skipstjóri og útgerðarmaður, hefur að þessu netaralli meðtöldu tekið þátt í þrettán slíkum og segir veiðina hafa gengið verr nú en í nokkru öðru netaralli sem hann hefur tekið þátt í.

„Þetta er bara voða lélegt. Ég held ég sé búinn að fara í þrettán [röll] núna og þetta er það lélegasta. Við fengum svolítið inn í Eyjafirði og Miðfirði annars var þetta bara lélegt. Lítið af fiski og miklu meira af blönduðum fiski en verið hefur öll hin röllin,“ segir Gylfi

„Það var lítið um æti. Við sáum hvergi nokkur staðar loðnuvott, en sáum aðeins inn í Eyjafirði einhverja síldarkræðu. Annars er þetta bara mjög dautt, það er bara þannig,“ segir hann.

Gylfi segir smá basl hafi verið að takast á við veður en allt hafi gengið vel. „Þetta tafði okkur bara um einhverja tvo daga, ekki meira en það.“

Leifur EA-888 lauk þátttöku í netaralli Hafrannsóknastofnunar í dag. mbl.is/Þorgeir

Meðalafli vikunnar tæp þrjú tonn

Óhætt er að segja að veiðin hafi ekki verið svakaleg á þessum síðasta degi Leifs á netaralli, en báturinn fékk aðeins 1.110 kíló. Það er mikil breyting frá föstudegi fyrir viku þegar Leifur landaði yfir 20 tonn.

Frá og með mánudegi hefur báturinn landað fimm sinnum og þá mest 4.605 kílóum en minnst í dag. Meðalafli í löndun í þessari viku er 2.869 kíló.

Spurður hvort aflinn gefi tilefni til að hafa áhyggjur af framhaldinu svarar hann því neitandi. „Þetta er alltaf svona í þessu. Góður dagur í dag og vondur á morgun. En það hefur aldrei verið svona átulítið hérna. Þetta er lélegasta rallið sem ég tek þátt í á allan hátt. Hvort þetta segi manni eitthvað um framhaldið, ég er nú ekki viss um það.“

Vænn þorskur var í aflanum sem landað var föstudag 12. apríl á Akureyri. Aflinn hefur ekki verið eins góður í þessari viku. mbl.is/Þorgeir

• Blogga um frétt