Verkþekking, vöruþróun og sjálfbærni

„Starfsemi okkar og framleiðsla byggist á verkþekkingu en ekki síður góðri samvinnu við skipstjórnarmenn, sem hafa sínar skoðanir og vita hvað virkar,“ segir Hjörtur Erlendsson forstjóri Hampiðjunnar í Morgunblaðinu í dag.

„Trollin sem við framleiðum eru í flestum tilvikum sérsniðin fyrir hvert og eitt skip og þá þarf að hafa í huga búnað þess, togkraft, á hvaða mið er sótt og fleira slíkt. Margt þarf að fara saman og því er samtalið mikilvægt.“

Piotr Poskrobko, til vinstri, og Bergþór Þorsteinsson taka til hendi í veiðarfæragerð Hampiðjunnar við Sundahöfn í Reykjavík. mbl.is/Sigurður Bogi

Stofndagur Hampiðjunnar var 5. apríl 1934. Guðmundur S. Guðmundsson, vélvirki og verkstjóri í Héðni, hafði þá kallað saman 12 manna hóp úr sjávarútvegi til þess að stofna fyrirtæki sem framleiddi garn og net úr náttúrulegum hamptrefjum.

Á Íslandi þótti skorta efni til veiðarfæragerðar og því kalli var svarað. Svo fór líka að ári eftir stofnun Hampiðjunnar voru framleiðsluvörur fyrirtækisins – þá einkanlega línur og net – orðnar allsráðandi á íslenskum skipum.

Ítarlega umfjöllun um Hampiðjuna má lesa í Morgunblaðinu í dag.