Miklar aðgerðir eftir að 14 þúsund laxar sluppu

Norska laxeldisfyrirtækið Lerøy Seafood Group áætlar að um 14 þúsund laxar yfir sjö kíló að stærð hafi sloppið úr sjókvíum dótturfélagsins Lerøy Midt í Reitholmen í Fillfirði. Eldissvæðið var eitt þeirra þar sem fannst óvenju mikið af dauðum fiski á síðasta ári.

Í fréttatilkynningu greinir Lerøy frá því að fimmta maí síðastliðinn hafi fundist gat á sjókví félagsins. Til stóð að hefja slátrun þegar gatið uppgötvaðist, að því er fram kemur í umfjöllun Intrafish.

„Við biðjumst afsökunar á atvikinu. Þetta á ekki að gerast. Við höfum framtíðarsýn um núll slysasleppingar og tökum þessu mjög alvarlega. Lerøy hefur sinn eigin umhverfis- og öryggishóp sem hefur nú hafið vinnu við að finna orsakir sleppingarinnar. Forgangsverkefni okkar núna er að takmarka umfang tjónsins og læra af atvikinu til að forðast slysasleppingu í framtíðinni,“ segir Harald Larssen, framkvæmdastjóri Lerøy Midt, í fréttatilkynningunni.

Hann segir gripið hafi verið til aðgerða til að ná að veiða laxinn sem slapp og eru aðgerðir framkvæmdar í samráði við yfirvöld.

Virkjuðu viðbragðáætlun

Larsen upplýsir að viðbragðsáætlun félagsins hafi um leið verið virkjuð og rúmlega 1.500 metrum af netum voru sett út að kvöldi 5. maí og nokkur þúsund metrar af netum voru sett út í gær. Þá verða enn fleiri net sett út í dag. Hann segir eiga sér stað viðræður við yfirvöld um hvaða fleiri aðgerða ber að grípa til.

Óskað hefur verið eftir aðstoð sjómanna og útgerða á svæðinu við að ná laxinum.

Lerøy sætti mikilli gagnrýni á síðasta ári eftir að upplýst var að fyrirtækið hefði ekki greint frá umtalsverðum laxadauða í sjókvíum félagsins á fleiri eldissvæðum.

Frétt af mbl.is

Þögðu um fjöldadauða

• Blogga um frétt