Alls hafa fundist 868 seiði úr eldisstöð Samherja fiskeldis að Núpsmýri í Öxarfirði í settjörn eldisstöðvarinnar. Ekki er ljóst hve mörg seiði sluppu úr stöðinni, að því er segir í tilkynningu á vef Matvælastofnunar.

Samherji fiskeldi segir í tilkynningu vegna málsins að um „óverulegt magn seiða var að ræða og er unnið að endurheimt þeirra úr settjörn í samráði við Matvælastofnun. Samhliða hefur verið unnið að orsakagreiningu og úrbótaáætlun er þegar komin í framkvæmd.“

Seiðin voru ekki sjógönguhæf en Matvælastofnun telur þau hafa geta orðið það í tjörninni og ekki sé hægt að útiloka að þau geti ratað þaðan í sjó.

Samherji fiskeldi hefur unnið að endurheimt fiska úr settjörn og nákvæmari talningu til þess að meta umfang stroksins.

Sleppivarnir ekki virkað sem skyldi

„Þann 6. maí síðastliðinn uppgötvaðist að seiði í eldisstöð Samherja fiskeldis að Núpsmýri í Öxarfirði höfðu borist úr einni af eldiseiningum seiðastöðvar yfir í settjörn stöðvarinnar. Seiðin sem um ræðir voru ekki sjógönguhæf. Samherji tilkynnti samdægurs um mögulega slysasleppingu til viðeigandi aðila, ásamt því að efldar voru varnir í frárennsli úr settjörn í viðtaka,“ segir í tilkynningu Samherja.

Þar er greint frá því að við fyrstu athugun virðist kerfisbilun í nýju eldiskerfi seiðastöðvar hafa valdið því að seiði soguðust í frárennsliskassa á eldiskeri og út um frárennslisrör, yfir í millibrunn og þaðan í settjörn.

Á þremur stöðum í frárennsliskerfi seiðastöðvarinnar eru sleppivarnir og er það á hverri eldiseiningu, millibrunni og settjörn. „Sleppivarnir á frárennsliskassa og millibrunni virðast ekki hafa virkað sem skyldi en þær hafa þegar verið yfirfarnar og efldar,“ segir í tilkynningu félagsins.

„Samherji fiskeldi hefur stundað landeldi í 25 ár án slíkra óhappa. Félagið vinnur eftir ströngum verklagsreglum og gæðastöðlum og leggur ríka áherslu á að stunda landeldi á sjálfbæran og öruggan hátt. Samherji fiskeldi harmar atvikið en strax var hafist handa við að rannsaka orsakir og hefja mögulegar úrbætur til að fyrirbyggja að slíkt endurtaki sig.“

Tengdar fréttir

Fiskeldi

Frestuðu slátrun til að hámarka verð

• Ræða sjókvíaeldið fyrir opnum dyrum
• „Ísland er í einstakri stöðu“
• 434 milljóna taprekstur hjá Arnarlaxi
• Eldisgreinar þurfi stöðugleika

» Fleiri tengdar fréttir

• Blogga um frétt