Lítið þokast í samningaviðræðum

„Í síðustu viku var fundur um skiptingu makríls og í næstu viku verða fundir um kolmunna og síld í Osló. Lítið hefur þokast í samningaviðræðum í öllum stofnum undanfarna mánuði,“ upplýsir matvælaráðuneytið í svari við fyrirspurn 200 mílna um gang samningaviðræðna strandríkja um skiptingu hlutdeilda í makríl, kolmunna og norsk-íslenskri síld.

Árangursleysið eru líklega nokkur vonbrigði fyrir fulltrúa Íslands en uppi voru háleit markmið um að ná samkomulagi milli Íslands, Grænlands, Færeyja, Bretlands, Noregs, Rússlands og Evrópusambandsins um skiptingu hlutdeilda ríkjanna í norsk-íslenskri síld á meðan viðræðurnar um tegundina (og kolmunna) voru leiddar af Íslandi.

Fyrst var stefnt að því að lenda samningum fyrir síðastliðin áramót en eftir að það tókst ekki var reynt að lenda samningum áður en Ísland lét af formennsku í mars.

Frétt af mbl.is

Munu reyna til hins ýtrasta að ná samkomulagi

„Ísland hefur sett einhliða aflamark undanfarin ár líkt og önnur ríki og þar sem ekki eru samningar um skiptingu aflamarks er ekki fyrirhuguð breyting þar á. Ísland, líkt og Noregur lækkaði aflamark í síld nú í vetur vegna bágborinnar stöðu stofnsins. Þannig setti Ísland einhliða aflamark sem 15,6% af ráðlögðum afla í stað 16.5% líkt og áður var,“ segir í svari matvælaráðuneytisins.

Deilurnar virðast misharðar eftir tegundum og hafa Norðmenn og Færeyingar undanfarið aukið úthlutun makrílkvóta til sinna skipa. Voru Norðmenn á síðasta ári sakaðir um að viljandi auka makrílkvóta sinn bara í þeim tilgangi að geta nýtt hann til að greiða Bretum fyrir aðgengi að breskri lögsögu þar sem norskum skipum var heimilt að veiða allt að 60% af makrílkvóta sínum.

Frétt af mbl.is

Vilja viðskiptaaðgerðir gegn Noregi og Færeyjum

• Blogga um frétt