Kaup Síldarvinnslunnar ganga til baka
Setja bókamerki
Kaup Síldarvinnslunnar hf. á Ice Fresh Seafood ehf. ganga til baka.
Þetta kemur fram í tilkynningu frá Síldarvinnslunni nú í kvöld.
Þar segir að stjórn Síldarvinnslunnar hafi samþykkt beiðni Samherja hf. um að kaup félagsins á helmingshlut í sölufyrirtækinu Ice Fresh Seafood ehf. gangi til baka.
Tilkynnt var um kaupin í september í fyrra með hefðbundnum fyrirvara um samþykki Samkeppniseftirlitsins.
„Að mati stjórnar Síldarvinnslunnar hf. hefur Samkeppniseftirlitið farið offari við skoðun málsins og gagnabeiðnir í engu samræmi við umgjörð viðskiptanna, sérstaklega í því ljósi að eingöngu er um að ræða sölu afurða á erlendum mörkuðum. Því líti út fyrir að gagnaöflunin sé farin að snúast um annað og meira en umrædd viðskipti,“ segir í tilkynningunni.
Í tilkynningunni segir einnig að Síldarvinnslan hafi afhent Samkeppniseftirlitinu öll gögn sem óskað hafi verið eftir og séu á forræði félagsins. Mikill vilji hafi verið til að klára þessi viðskipti enda aðdragandinn langur og ávinningur fyrir íslenskan sjávarútveg augljós.
Ákvörðunin tekin með hagsmuni félagsins í huga
„Ákvörðun stjórnar Síldarvinnslunnar hf. er tekin með hagsmuni félagsins í huga. Er það ekki síst vegna viðamikilla verkefna í kringum starfsemi Vísis ehf. í Grindavík en í liðinni viku hófst enn á ný eldgos í námunda við bæjarfélagið,“ segir í tilkynningunni.
Fram kemur í tilkynningunni að það sé mat stjórnenda Síldarvinnslunnar hf. að íslensk sjávarútvegsfyrirtæki þurfi að styrkja stöðu sína til að viðhalda samkeppnishæfni íslensks sjávarútvegs í alþjóðlegu viðskiptaumhverfi, þar sem hlutdeild Íslands er agnarsmá.
„Nauðsynlegt er fyrir íslenskan sjávarútveg í heild sinni að mæta þessum áskorunum erlendis með því að styrkja alþjóðleg sölufyrirtæki, sem geta keppt við þessa risa á grundvelli afhendingaröryggis, verðs og gæða,“ segir að lokum í tilkynningunni.
Bjarni: „Útilokað að þetta geti gengið upp“
Var engin kristnitaka árið 1000?
Barn lést í árásinni
Forstjóri bendir á ábyrgð birgja vegna verðhækkana
Skattamál verði líklega „þeirra mesta klemma“
Ný ríkisstjórn kynnt á morgun
Stormur á Þorláksmessu en víðast hvar stefnir í hvít jól
