„Ber lagaleg skylda“ til að gefa út hvalveiðileyfi
Setja bókamerki
„Ég hef ákveðið að gefa út leyfi til hvalveiða og það er vegna þess að mér ber lagaleg skylda til þess að gera það. Ég hef engu að síður ákveðið að gera það eingöngu fyrir yfirstandandi ár.“
Þetta segir Bjarkey Olsen matvælaráðherra um ákvörðun sína að heimila hvalveiðar á komandi vertíð til eins árs.
Að sögn hennar nær heimildin til veiða á 128 langreyðum á tveimur hafsvæðum.
Hún segir þessa ákvörðun ekki endilega í takti við stefnu VG en hún þurfi að fara eftir lögum og reglum.
Hún segir reglurnar við hvalveiðarnar sambærilegar þeim sem framfylgt var í fyrra en bendir á að Matvælastofnun hafi lagt til þrengri reglur við veiðarnar. Þær tillögur séu til skoðunar í ráðuneytinu.
Leyfið áður gefið seint út
Varðandi gagnrýni á það hve langan tíma það hefur tekið að taka þessa ákvörðun, þá segir Bjarkey að þeir tveir mánuðir sem hún hafi gefið sér í ákvörðunina sé ekki óvenjulegur. Bendir hún á að Kristján Þór Júlíusson hafi á sínum tíma sem sjávarútvegsráðherra gefið út leyfi sem tók gildi 5. júlí. Hann hafi gefið sér fjóra mánuði í ákvörðunina.
Nú segir þú að veiðarnar samræmist ekki þínum skoðunum. Sérðu fyrir þér að koma á hvalveiðibanni í þinni ráðherratíð?
„Breytingar á lögunum þurfa að fara í gegnum þingið. Það verður að koma í ljós hvernig því reiðir af. Við í ráðuneytinu munum halda áfram að vinna að stefnumótun í málaflokknum. Við horfum í því til alþingis og alþjóðahvalveiðiráðsins og allra þeirra breytinga sem hafa átt sér stað fram til þessa. Og við sem land og þjóð þurfum að velta því fyrir okkur hvort við viljum halda áfram,“ segir Bjarkey.
Engin hafi beitt þrýstingi
VG mælist með rúm 3% í skoðanakönnunum. Spurð hvort hún óttist ekki fylgislækkun vegna ákvörðunarinnar þá segir Bjarkey að hún sé að fara eftir lögum í landinu og hún vonist eftir skilningi á þeirri aðstöðu sem ráðherrann er í.
Aðspurð segir hún að enginn úr ríkisstjórninni hafi þrýst á hana varðandi ákvarðanatöku í málinu.
Vill markvissari uppbyggingu
Bregðast ókvæða við: Pútín ekki tjáð sig
Annar sæstrengur rofinn: Svíar á varðbergi
Afgreiðsla búvörulaga í andstöðu við stjórnarskrá
Sæstrengur rofinn og grunur um skemmdarverk
Lega borgarlínu breytist í miðbænum