Landaði fullfermi eftir kropp

Ísfisktogarinn Bergur VE kom til heimahafnar í Vestmannaeyjum í gær með fullfermi og var landað úr skipinu í morgun. Fram kemur í færslu á vef Síldarvinnslunnar að aflinn var mest ufsi og ýsa.

„Við byrjuðum á Pétursey og Vík og fengum þar þorsk. Síðan var haldið á Mýragrunn en þar fékkst dálítill ufsi. Þá var haldið á Stokksnesgrunn þar sem fékkst ýsa og loks endað í ýsu á Papagrunni. Þetta var fínasta kropp en auðvitað vantar ufsann eins og að undanförnu. Hann ætlar að reynast okkur erfiður,“ er haft eftir Jóni Valgeirssyni skipstjóra í færslunni.

„Túrinn tók fjóra sólarhringa og þar af fór sólarhringur í keyrslu. Við byrjuðum í austan brælu en síðan var bongóblíða það sem eftir var. Fiskurinn sem fékkst var bara virkilega fallegur. Hér um borð eru menn bara brattir og það er reiknað með að halda á ný til viða á fimmtudagsmorgun,” segir Jón.

• Blogga um frétt