27% sjómanna sögðust upplifa einelti eða áreitni

Meira en fjórðungur norskra sjó- og farmanna segist verða fyrir einelti og áreitni á vinnustað og hafa þarlend stjórnvöld gripið til sérstakra aðgerða til að bæta starfsumhverfi til sjós. Könnun á þessum málum hefur ekki verið framkvæmd meðal sjómanna hér á landi síðan 2015 þegar tæp 40% svarenda sögðust hafa orðið fyrir einelti eða áreitni, að því er fram kom í umfjöllun sjómannadagsblaðs 200 mílna.

Norska siglingastofnunin, Sjøfartsdirektoratet, ákvað á síðasta ári að árið 2024 yrði helgað svokölluðu sálfélagslegu vinnuumhverfi á sjó. Kom ákvörðunin í kjölfar þess að sérstök könnun stofnunarinnar, sem náði til rúmlega átta þúsund einstaklinga sem starfa til sjós, sýndi að tæplega 27% svarenda sögðust hafa orðið fyrir einelti eða áreitni á vinnustað undanfarna 12 mánuði.

Athygli vekur að hlutfallið virðist hafa verið nokkuð svipað eftir tegund sjófara sem einstaklingarnir starfa á. Sögðust 26,2% þeirra sem störfuðu á fiskiskipum hafa orðið fyrir einelti eða áreitni á vinnustað, 26,07% þeirra sem störfuðu á flutningaskipum og 29,08% þeirra sem störfuðu á farþegaskipum.

Umfjöllunina má nálgast hér.