Segir sjómenn hafa vaknað upp við vondan draum

Valmundur Valmundsson, formaður Sjómannasambands Íslands, segir sjómenn hafa vaknað upp við vondan draum í fyrradag þegar allar sjónvarpsútsendingar voru horfnar úr skipum sem voru á djúpveiðum.

Ríkisútvarpið hætti útsendingum í gegnum gervihnetti þann 1. júlí, sem hefur gert nokkur skip á sjó sambandslaus og víða vakið pirring á meðal sjómanna.

Ekkert samráð

Valmundur Valmundsson, formaður Sjómannasambands Íslands, segir sjómannafélögin nýta þessa þjónustu mest.  „Mörg þessara skipa sem eru í notkun eru ekki komin með tækjabúnað til þess að ná sjónvarpsútsendingu frá RÚV,“ segir Valmundur. 

Frétt af mbl.is

Stöðva gervihnattaútsendingar fyrir sjófarendur

Hann nefnir að tækniþróun sé á miklum hraða í dag og bendir á Starlink, sem er netþjónusta sem er veitt í gegnum gervihnetti og myndi meðal annars gera skipum kleift að fá aðgang að sjónvarpi og fleiru. 

„En það eru ekkert öll skip komin með þennan búnað. Þó að það standi örugglega til að setja þennan búnað í öll skip þá hefur það samt ekki enn verið gert. Því fannst okkur skrítið að það hafi ekki verið haft samráð við okkur um þetta mál,“ segir Valmundur aðspurður. 

Frétt af mbl.is

Biðla til Áslaugar um 20 milljónir fyrir sjónvarp

Ekki dýrt fyrir stofnun sem fær 5 milljarða

Valmundur segir kostnaðinn við útsendingarnar vera lítinn í samanburði við heildarrekstur RÚV. „Þetta kostar nú ekki hálfan handlegginn, þetta er ekki mjög dýrt fyrir stofnun sem fær fimm milljarða frá ríkinu,“ segir hann og bætir við að kostnaðurinn við þessar útsendingar sé í kringum 40 milljónir. 

Portúgalarnir Pepe og Cristiano Ronaldo glaðir í bragði á Evrópumótinu. AFP/Patricia De Melo Moreira

Spurður um viðbrögð sjómanna segir Valmundur að þeir séu brjálaðir. „Það er Evrópumót í gangi og til þess að stytta sér stundir á sjónum þá eru menn að horfa á fótbolta en nú er það ekki hægt.“

Lilja Alfreðsdóttir menningarmálaráðherra hefur óskað eftir að því við útvarpsstjóra að útsendingum verði haldið áfram til áramóta, allavega þar til fyrir liggur hvaða skip eiga eftir að fá þann búnað sem til þarf. 

• 1 blogg um fréttina

Bloggað um fréttina

• Birgir Örn Guðjónsson: RUV á hafinu...