Arnar Atlason, formaður Samtaka fiskframleiðenda og útflytjenda (SFÚ), segir í samtali við Morgunblaðið í dag yfirlýsingu Samtaka fyrirtækja í sjávarútvegi (SFS) um strandveiðar sem birt var á vef samtakanna síðastliðinn mánudag bera keim af hroka og yfirgangi. Jafnframt sé yfirlýsingin full af staðreyndavillum að mati Arnars sem sakar SFS um hræsni. 

Í yfirlýsingunni er Bjarkey Olsen Gunnarsdóttir matvælaráðherra sögð hafa látið undan græðgi strandveiðisjómanna er hún bætti tvö þúsund tonna þorskkvóta við aflaheimildir strandveiðanna.

Með viðbótinni er hlutfall aflaheimilda sem er ráðstafað til strandveiða hærra en nokkru sinni fyrr, en rúmlega fimmtungs skerðing hefur verið í þorskkvóta annarra útgerða á sama tíma. Fullyrtu SFS að strandveiðar væru óskynsamlegar og óarðbærar og lýstu þeirri skoðun að betra væri að ráðstafa aflaheimildum í veiðar sem skila þjóðarbúinu meiri verðmætum.

Frétt af mbl.is

Harma að látið sé undan græðgi strandveiðisjómanna

„Ég vil nota tækifærið til að hrósa matvælaráðherra fyrir framsýnina. Að mínu viti er það ekki bara skynsamlegt heldur einnig nauðsynlegt að styrkja þann hluta veiða Íslendinga sem standa utan við aflamarkskerfið okkar. Þær veiðar geta að mínu mati veitt aflamarkskerfinu aðhald og styrkt það til lengri tíma,“ segir Arnar. 

Hann gagnrýnir fullyrðingu SFS um að verðmætasköpun sé tryggð með samþættum rekstri útgerðar og vinnslu. „Samkeppniseftirlitið hefur ítrekað bent á að með lóðréttri samþættingu aukist hætta á undirverðlagningu sem geti haft neikvæð áhrif á tekjur hafnarsjóða og ekki síður á tekjur ríkissjóðs. Þetta stemmir að sama skapi við alþjóðlega skattaumræðu sem álítur lóðrétt samþætt fyrirtæki geta skapað hættu á undirverðlagningu í innri viðskiptum.“

Þá efast Arnar um meintan árangur samþætts rekstrar. „Sérstaklega þegar horft er til niðurlags yfirlýsingarinnar þar sem talað er um byggðafestu, en allir sem það vilja sjá að kerfi lóðrétt samþættrar vinnslu og veiði fyrirtækja hefur algjörlega brugðist þegar kemur að því að viðhalda byggðafestu. Að halda öðru fram er skrumskæling.“

Viðtalið við Arnar má lesa í heild sinni Morgunblaðinu í dag.

Tengdar fréttir

Strandveiðar

„Þetta er bara hræðsluáróður“

• Lýsa áhyggjum af áformum ríkisstjórnar
• Óásættanlegt að taka atvinnu af öðrum
• „Þetta er svo mikil bull umræða“
• Binda enda á 63 ára útgerðarsögu

» Fleiri tengdar fréttir