Andi Hrafns fylgir bátnum

Nýr strandhreinsibátur Veraldarvina var vígður á hátíð samtakanna um helgina. Hefur hann verið nefndur í höfuðið á rithöfundinum og blaðamanninum Hrafni Jökulssyni sem lést í september árið 2022. Hann gaf sig að starfi Veraldarvina við lok ævi sinnar.

Báturinn gegndi áður hlutverki dráttarbáts en athafnarmaðurinn Róbert Guðfinnsson gerði Veraldarvinum kleift að eignast fleyið. Það kom í hlut Elísabetar Jökulsdóttur, systur Hrafns, að vígja bátinn.

Þórarinn Ívarsson stofnandi Veraldarvina hefur á rúmum 20 árum fengið til landsins allt að tvö þúsund sjálfboðaliða á ári hverju, 22 þúsund þegar allt er talið, sem einbeita sér að náttúruvernd. Hann er sáttur við nýja bátinn.

„Þetta fallega fley mun gagnast okkur vel við hreinsun strandlengjunnar. Við höfum saknað vinar okkar Hrafns frá því hann féll frá og ég er viss um að andi hans mun fylgja bátnum hvert sem hann fer. Róbert Guðfinnsson fær sérstakar þakkir fyrir hans framlag til þessa verkefnis.“