Selja Örfirisey

Verið er þessa dagana að ganga frá ýmsum pappírum viðvíkjandi sölu togarans en vinna við slík formsatriði getur tekið sinn tíma.

Þegar þau eru frágengin á næstu vikum verður togaranum siglt suður um höfin, skv. upplýsingum frá Guðmundi Kristjánssyni framkvæmdastjóra Brims.

Tekinn úr útgerð í vor

Örfirisey er 1.845 brúttótonna skip, smíðað árið 1988. Hefur þjónað Brimi og fyrirrennurum þess í rúmlega 30 ár en er nú komið á tíma ef svo má segja.

Togarinn var tekinn úr útgerð í vor og hefur síðan þá legið við bryggju í austurhöfninni í Reykjavík. Í stað Örfiriseyjar er í skipastól Brims kominn frystitogarinn Þerney RE 1.

Togaraflotinn hefur verið að tínast út á síðustu dögum og nokkrir voru á Vestfjarðamiðum í gær skv. marinetraffic.com. Hugsun útgerða er þá að klára veiðiheimildir áður en nýtt fiskveiðiár gengur í garð 1. september.