Håkon nýr stjórnarformaður

Håkon André Berg verður nýr starfandi stjórnarformaður landeldisfyrirtækisins GeoSalmo. Samhliða því að taka við stjórnarformennsku fjárfestir Håkon í félaginu og verður meðal stærstu hluthafa félagsins. Þetta kemur fram í tilkynningu frá GeoSalmo.

„Håkon var áður forstjóri norska landeldisfyrirtækisins Salmon Evolution frá fyrstu skrefum þess og þar til eldisstöðin komst í fullan rekstur. Salmon Evoulution er stærsta landeldi Noregs og í fararbroddi í landeldi á laxi á heimsvísu,“ segir í tilkynningunni.

Reynsla á ýmsum sviðum

Þá segir að auk reynslu af landeldi hafi Håkon í gegnum tíðina starfað við fjárfestingar, viðskiptaþróun og ráðgjöf auk þess að sitja í stjórnum fyrirtækja.

Håkon kemur til GeoSalmo eftir að hafa starfað sem forstjóri norska fjárfestingarfyrirtækisins Skeie teknologi.

GeoSalmo stefnir á uppbyggingu hátæknilandeldis í Þorlákshöfn en í tilkynningunni frá fyrirtækinu segir að reynsla Håkons komi til með að reynast vel í því verkefni.

• Blogga um frétt