Veiddu fyrir 198 milljarða í fyrra

Samkvæmt Hagstofunni veiddust alls tæplega 402 þúsund tonn af botnfiski sem er 7% minna en árið 2022. Þá dróst á sama tíma aflaverðmæti botnfiskaflans saman um 7%, eða úr 136 milljörðum króna í 126 milljarða króna.

Mest veitt af loðnu

Af botnfiski nam þorskaflinn alls 220 þúsund tonnum á síðasta ári og aflaverðmæti hans við fyrstu sölu nam tæplega 81 milljarði króna.

Afli uppsjávartegunda var rúm 946 þúsund tonn árið 2023, sem er um 1% minni afli en árið áður. Af uppsjávarafla veiddu íslensk uppsjávarskip mest af loðnu, eða tæp 326 þúsund tonn, og tæp 293 þúsund tonn veiddust af kolmunna.

Aflaverðmæti uppsjávaraflans jókst um 22% frá fyrra ári og skiptust 58 milljarðar króna nokkuð jafnt á milli kolmunna, loðnu, makríls og síldar.

Af flatfiski veiddust tæplega 21 þúsund tonn árið 2023 og nam aflaverðmætið um 12 milljörðum króna.

Löndun skelfisks og krabbadýra dróst saman um 5% og var tæplega 5,8 þúsund tonn að verðmæti 1,2 milljarðar króna.

Samkvæmt gögnum Hagstofunnar var töluverður munur á milli janúarmánaða í veiddum afla árin 2023 og 2022. Til að mynda veiddust 220 þúsund tonn árið 2022, eða 50% meira en á sama tímabili í fyrra, en þá veiddust 110 þúsund tonn. Þrátt fyrir þann mun var aflaverðmætið eingöngu 6% meira í janúar 2022, samanborið við sama tíma í fyrra.