Fáar skipasmíðastöðvar enn virkar

Þráinn Jónsson, framkvæmdastjóri Skipasmíðastöðvar Njarðvíkur, segir aðspurður að fáir séu eftir á markaðinum.

„Það eru örfáar skipasmíðastöðvar á Íslandi sem eru virkar. Það eru stórir aðilar eins og Slippurinn á Akureyri og Framtak sem Vélsmiðja Orms og Víglundar í Hafnarfirði keyptu. Það er svo bara einn slippur í Reykjavík, Stálorka, sem hefur aðstöðu til að taka skip en þeir eru ekki mjög virkir á markaðinum. Síðan erum það við – Skipasmíðastöð Njarðvíkur.“

Margar farið í þrot

Hann bendir á að skipasmíðastöðinni á Akranesi hafi verið lokað og starfsemin í Stykkishólmi og Vestmannaeyjum dregist mikið saman.

„Það er nánast búið að loka á Ísafirði og lítið að gera á Skagaströnd. Stöðin á Húsavík sinnir bara verkefnum fyrir Norðursiglingu, sem er eigandi stöðvarinnar,“ segir Þráinn.

Hann segir að margar stöðvar hafi einfaldlega farið í þrot vegna breyttra markaðsaðstæðna.

„Það var einfaldlega ekkert pláss á markaðinum fyrir svona mörg fyrirtæki enda hefur skipum og bátum fækkað mikið á Íslandi á undanförnum árum. Fækkun stöðva hefur hjálpað þeim fyrirtækjum sem eftir eru til að taka fleiri skip á ári hverju en þekktist hér áður fyrr,“ útskýrir Þráinn.

Aðspurður segir hann að fyrirtæki sitt taki um 90 skip og báta á ári hverju í reglulegar skoðanir og nauðsynlegt viðhald.

„Í langflestum tilfellum tökum við skip í reglubundið viðhald og skoðun. Skip þurfa að fara í slipp á tveggja til þriggja ára fresti, það er að segja í reglubundna skoðun. Þess á milli eru alltaf einhverjar uppákomur sem krefjast þess að farið sé með skipin í slipp,“ segir Þráinn.