Afli dróst saman um 18%

Landaður afli í september á þessu ári var 98 þúsund tonn, sem er 18% minna en í sama mánuði í fyrra. 

Veiði jókst í öllum helstu tegundum botnfiska. Þorskafli var tæplega 21 þúsund tonn og jókst um 19% miðað við september í fyrra, ýsuafli jókst um 11% og ufsaafli um 9%. Flatfiskafli jókst einnig um 57%, að því er segir í tilkynningu frá Hagstofu Íslands.

Samdráttur var aðallega í uppsjávarfiskum þar sem engin loðna var veidd og lítið af kolmunna og makríl. Uppsjávaraflinn var aðallega tæp 58 þúsund tonn af síld sem er 28% minni afli en í september í fyrra.

Afli á 12 mánaða tímabilinu frá október 2023 til september 2024 var rétt rúmlega milljón tonn, sem er 27% samdráttur frá sama tímabili ári fyrr. Það skýrist að mestu af því að engin loðna hefur verið veidd síðasta árið. Botnfiskafli jókst um 5% á milli þessara tímabila.

• Blogga um frétt