Þúsundir smáskilaboða fundust í tölvu
Setja bókamerki
Tengdar fréttir
Samherji
Héraðssaksóknari komst nýverið yfir á annað þúsund smáskilaboð, sem fóru á milli Þorsteins Más Baldvinssonar, forstjóra Samherja, og uppljóstrarans Jóhannesar Stefánssonar á þeim tíma sem hinn síðarnefndi var framkvæmdastjóri útgerðarfélags Samherja í Namibíu.
Heimildin greinir frá.
Tæknimenn á vegum héraðssaksóknara fundu þúsundir smáskilaboða, sem voru annað hvort send eða móttekin úr síma Jóhannesar á þeim tíma er hann starfaði í Namibíu.
Skilaboðin fundust á tölvu sem hann afhenti saksóknara árið 2019. Af þeim náðu tæknimennirnir að endurheimta ríflega 1.500 skilaboð sem fóru á milli Jóhannesar og Þorsteins Más.
Í umfjöllun Heimildarinnar segir að tölvan hafi tekið öryggisafrit af símanum um það leyti er Jóhannes lét af störfum hjá fyrirtækinu, en hann vann í Namibíu frá árinu 2011 til 2016.
„Takmörkuð“ samskipti
Í yfirheyrslu hjá embætti héraðssaksóknara fyrir fjórum árum vísaði Þorsteinn því á bug að hann hefði verið í miklum samskiptum við Jóhannes. Sagði hann samskiptin hafa verið „takmörkuð“.
Heimildin segir skilaboðin varpa ljósi á aðra mynd af samskiptum Jóhannesar við forstjóra og starfsmenn Samherja en forsvarsmenn Samherja hafa haldið fram opinberlega.
Samkvæmt upplýsingum miðilsins eru Jóhannes og Þorsteinn að skipuleggja myndsímtalafundi sín á milli í skilaboðunum.
Segir Þorstein hafa frekar viljað ræða saman í myndsímtölum
Í umfjöllun Kveiks og Stundarinnar árið 2019 sagði Jóhannes að Þorsteinn hefði viljað ræða við sig í gegnum myndsímtöl frekar en með öðrum hætti en Jóhannes starfaði í Namibíu.
Sagði Jóhannes að Þorsteinn hefði í myndsímtölunum „gefið grænt ljós“ á mútugreiðslur til namibískra ráðamanna.
Heimildin segir að smáskilaboðin hafi verið borin undir Þorstein Má í yfirheyrslu sem nýlega fór fram. Segir í umfjölluninni að yfirheyrslurnar verði með þeim síðustu áður en ákvörðun verði tekin um hvort og hverjir munu fara fyrir dóm í málinu.
Tengdar fréttir
Samherji
Landsbankinn segir að skoða þurfi málið nánar
„Ansi sérstakt“ ef Inga notfærði sér stöðu sína
„Við treystum því að þetta muni fara vel“
„Stærsti núverandi baráttuvettvangur stórveldanna“
Þrot vofir yfir Flokki fólksins
Mikil misbeiting á ráðherravaldi
Lausatök í styrkgreiðslum til flokkanna
Brýn nauðsyn að endurskoða hættuna á stórgosi