Lönduðu afla fyrir 290 milljónir króna

Blængur NK, frystitogari Síldarvinnslunanr, kom til Neskaupstaðar í gærmorgun með 700 tonna afla eftir 26 daga veiðiferð og nam aflaverðmætið 290 milljónum króna. Aflinn var að mestu karfi og ýsa en einnig hafði fengist þorskur gulllax, grálúða og ufsi, að því er fram kemur í færslu á vef Síldarvinnslunnar.

„Við fórum hringinn í þessum túr en mest var verið að veiðum við suðausturlandið og út af Vestfjörðum. Gulllaxinn var síðan veiddur fyrir sunnan land. Við erum sáttir við aflann, en það fór mikill tími í að reyna við ufsa og grálúðu með takmörkuðum árangri,“ er haft eftir Bjarna Ólafi Hjálmarssyni skipstjóra í færslunni.

„Segja má að hér sé um að ræða hefðbundinn túr sem almennt gekk vel. Við þurftum að vísu að fara einn dag inn á Dalvík til að láta gera við flökunarvélina. Flökunarvélin er hjartað í vinnslunni og hún verður að vera í lagi. Veðrið í túrnum var þokkalegt allan tímann, ekta haustveður og dálítill kaldi en engar stórar brælur,” segir Bjarni Ólafur.

Blængur heldur til veiða á ný í kvöld.

• Blogga um frétt