Tókst að slökkva eld um borð í Jökli

Með skjótum viðbrögðum tókst skipverjum á Jökli ÞH að slökkva eld sem hafði kviknað á vinnsluþilfari skipsins í júlí á síðasta ári er skipið var um 60 sjómílur norðaustur af Horni í hægviðri.

Fram kemur í skýrslu Rannsóknanefndar samgönguslysa að 17. Júlí 2023 var verið að sjóða í rör sem höfðu brotnað sem héldu plötu við færiband við aðgerðasvæði á vinnsluþilfarinu. Um hálftíma eftir að þeirri vinnu var lokið urðu skipverjar varir við reyk sem barst úr lestarlúgu í eldhúsi skipsins og sá skipstjórinn að eldur hafði kviknað í öryggismyndavélum.

Hafði kviknað í svokölluðum burstakambi sem sér til þess að halda færibandinu hreinu.

Skömmu síðar héldu „skipverjar á staðinn með handslökkvitæki meðan tveir fóru að setja á sig slökkvibúninga og reykköfunartæki. Sá sem fyrstur kom að eldinum var með hlífðargrímu en engan annan hlífðarbúnað. Tæmdi hann úr þremur handslökkvitækjum en sprautaði því næst með sjóslöngu og náði að slökkva eldinn,“ segir í skýrslunni.

Minna á hættuna af glóð frá rafsuðu

Að lokinni greiningunefndarinnar á myndefni úr öryggismyndavélum þykir ljóst að eldsupptökin megi rekja til viðgerðarinnar þar sem verið var að rafsjóða og glóð hafi farið í burstakamb.

„Viðgerðin fór fram stuttu eftir að vinnsluþilfar hafði verið þrifið á meðan þeir sem voru á vakt voru nýfarnir í kaffi. Þrátt fyrir að svæðið hafi verið blautt verður að hafa það í huga að glóð frá rafsuðu getur verið mjög heit. Glóð hefur náð að krauma í hálftíma áður en eldurinn braust út,“ segir í skýrslunni.

Nokkrar skemmdir urðu um borð. Ljósmynd/RNSA

• Blogga um frétt