Tilkynnt var um það fyrr í mánuðinum að vísindamenn ráðleggja að ekki verði stundaðar loðnuveiðar í Barentshafi árið 2025, en fyrir árið 2024 nam ráðgjöfin 194 þúsund tonnum. Ráðgjöf um engar loðnuveiðar í Barentshafi hafa þó verið töluvert algengar frá því að nýtingarstjórnun var tekin upp á níunda áratug síðustu aldar.

Mælingar gengu vel að því er segir á vef norsku hafrannsóknastofnunarinnar (Havforskningsinstituttet) og þær sýndu að ekki nægilegt magn loðnu í Barentshafi væri að ná kynþroskaaldri. Af þessari ástæðu leggja vísindamenn til að engar veiðar verði stundaðar „svo að stofninn geti snöggt náð sér á ný.“

Loðnubrestur óalgengari á Íslandsmiðum

Sem fyrr segir er núllráðgjöf ekki óalgeng fyrir loðnu í Barentshafi og hafa sést miklar sveiflur í stofnmatinu og þar af leiðandi ráðgjöf um hámarksveiði allt frá því að ráðgjöf var tekin upp 1988. Loðnubrestur hefur þó orðið oftar og veiddist til að mynda engin loðna í Barentshafi árin 1965, 1966 og 1967.

Loðnubrestur hefur sögulega séð verið óalgengari hér á landi frá því að aflamarkskerfið var tekið upp og varð í fyrsta sinn loðnubrestur tvö ár í röð vertíðirnar 2019 og 2020.

Að óbreyttu stefnir í loðnubrest tvö á í röð í annað sinn hér á landi vegna ráðgjöf Hafrannsóknastofnunar um enga loðnuveiði á komandi vertíð. Þó getur ráðgjöfin verið endurmetin að lokinni vetrarmælingu í janúar.

Loðnuafli hefur verið langtum meiri á Íslandsmiðum undanfarna áratugi og hefur heildarafli íslenskra skipa náð yfir 20 milljónum tonnum af loðnu frá árinu 1990 en á sama tíma hefur loðnuafli rússneskra og norskra skipa í Barentshafi aðeins numið rúmum sex milljónum tonna.

Tengdar fréttir

Loðnuveiðar

Loðnumæling tafðist er Árni leitaði í var

• Fyrstu skipin til loðnumælinga
• „Við urðum örlítið varir við loðnu“
• Töf á mælingu vegna viðgerðar
• Lítið sást til loðnunnar

» Fleiri tengdar fréttir

• Blogga um frétt