Ríkið fjármagni sýnatökur skelræktar

Samráðshópur um skeldýrarækt  telur brýnt sé að ríkissjóður komi til móts við kræklingaræktendur og tryggi að sýnagreining skeldýraeiturs fari fram innanlands og taki þátt í kostnaði við greininguna. Einnig telur hópurinn nauðsynlegt að ríkið fjármagni opinbert eftirlit með sýnatökum ræktenda og heilnæmiskönnun á innanverðum Breiðafirði.

Óskað er eftir því að fjárlaganefnd Alþingis veiti 86 milljóna króna fjárheimild í fjárlögum næsta árs til kaupa á greiningartæki og notkun þess. Auk þess sem tíu milljónir af þessum krónum verði ráðstafað til Skelræktar, hagsmunasamtaka skelræktenda.

Þetta má lesa úr minnisblaði sem hópurinn hyggst leggja fyrir fjárlaganefnd og fjallað er um á vef Bæjarins Besta.

Samkvæmt minnisblaðinu er áætlað að þrjú félög geta hafið ræktun á kræklingi á næsta ári og samanlagt framleitt 200 til 250 tonn þetta fyrsta rekstrarár. Þá er gert ráð fyrir að framleiðslan gæti tvöfaldast á hverju ári eftir það. Félögin eru öll með ræktunarsvæði við innanverðan Breiðafjörð.

Frétt af mbl.is

Sækja um leyfi til að rækta bláskel

„Heilnæmiskönnun fyrir innanverðan Breiðafjörð í heild sinni ásamt greiningu sýna innanlands með kostnaðarþátttöku ríkis myndi opna á heilt strandsvæði til umsókna tilrauna- og/eða ræktunarleyfa kræklingaræktar án aukins kostnaðar ræktenda fyrir hvert fyrirhugað og afmarkað ræktunarsvæði. Væri það til þess fallið að leggja grundvöll að atvinnusköpun, fjárfestingum og uppbyggingu á strandsvæðum og byggðum sem hafa ekki aðstöðu til þess að stunda hefðbundna útgerð og hafa sumar verið skilgreindar sem brothættar byggðir,“ segir í minnisblaðinu.

Stuðningur sveitarfélaga

Þá hafa sveitarfélög verið beðin um að styðja tillögur hópsins og gerast aðilar að umræddu minnisblaði. Má lesa í fundargerðum bæjarráðs Bolungarvíkurkaupstaðar og sveitastjórnar Súðavíkurhrepps að sveitarfélögin taka vel í hugmyndirnar, en fyrir hefur Reykhólahreppur haft aðild að samráðshópnum.

Samráðshópurinn var stofnaður í vor og hafa átt aðild fulltrúar Matvælastofnunar, Hafrannsóknastofnunar, Matís, Skelræktar, Vestfjarðastofu og Reykhólahrepps, en matvælaráðuneytið hefur haft áheyrnafulltrúa í hópnum. Honum hefur verið gert að fækka hindrunum sem hafa staðið í vegi skeldýraræktar á Íslandi.

• Blogga um frétt