Landaði 1.600 tonnum þrátt fyrir slæmt veður

Barði NK kom til Neskaupstaðar í gærmorgun með 1.600 tonn af kolmunna eftir átta daga á miðunum. Veður var slæmt megnið af tímanum að því er segir í færslu á vef Síldarvinnslunnar. Þar segir Þorkell Pétursson skipstjóri að mikið hafi þurft að hafa fyrir kolmunnanum.

„Við vorum í Rósagarðinum í íslenskri lögsögu allan túrinn. Tekið var eitt hol á dag þannig að holin voru átta talsins. Dregið var frá 10 tímum og upp í tæpan sólarhring. Afli í holi var frá 100 tonnum og upp í 270. Bátarnir voru almennt að fá 10 – 15 tonn á togtíma en það voru mest fimm bátar að veiðum á þessum slóðum. Nú er veiðin eitthvað að hressast í færeyskri lögsögu og þegar síðast fréttist voru íslensku bátarnir komnir þangað,“ segir Þorkell.

• Blogga um frétt